Pandharpur Cleanliness Drive : महास्वच्छता अभियानातून पंढरपुरात १४८ टन कचरा गोळा

Pandharpur News : पंढरपूर शहर महास्वच्छता अभियान २०२५ अंतर्गत रविवारी (ता. २२) एकाच वेळी सकाळी सात ते दहा या कालावधीत ४२ ठिकाणी स्वच्छता मोहीम राबवून १४८ टन कचरा गोळा करण्यात आला.

या मोहिमेत राज्याचे ग्रामविकास व पंचायतराज मंत्री तथा जिल्ह्याचे पालकमंत्री जयकुमार गोरे, आमदार समाधान आवताडे, आमदार सचिन कल्याणशेट्टी, आमदार देवेंद्र कोठे यांच्यासह सोलापूर जिल्हा प्रशासनातील अधिकारी, कर्मचारी, सामाजिक संस्थांचे स्वयंसेवक, विविध सामाजिक संघटना, पंढरपूर शहरातील नागरिक यांनी सक्रिय सहभाग घेऊन ही विठुरायाची नगरी बहुतांश स्वच्छ केली आहे.

या मोहिमेतून पंढरपूर शहर व येथे येणाऱ्या हजारो भाविकांच्या घरोघरी स्वच्छतेचा संदेश पोहोचविण्याचे क्रांतिकारी कार्य घडले असल्याचे प्रतिपादन या वेळी पालकमंत्री गोरे यांनी केले. ते म्हणाले, की या स्वच्छता अभियानातून श्री विठुरायाची नगरी स्वच्छ करण्याचे काम आपल्या सर्वांच्या श्रमातून झालेले आहे, ही वारी पूर्वीची स्वच्छता असून वारीनंतरही स्वच्छता करण्यात येणार आहे.

या मोहिमेसाठी जिल्ह्यासह सातारा जिल्ह्यातीलही सामाजिक संस्थांनी पुढाकार घेतला असून, यामध्ये तरुणांचा सहभाग महत्त्वपूर्ण बाब होती. पुढील काळात या स्वच्छतेच्या संदेशाबाबत नागरिकांमध्ये प्रबोधन करतील व स्वतःही क्रियाशीलपणे राबवतील.

पंढरपूर हे संपूर्ण राज्यासाठी महत्त्वाचे व पवित्र धार्मिक ठिकाण असून या विठुरायाच्या नगरीच्या सर्वांगीण विकासासाठी शासन कटिबद्ध आहे. पंढरपूरच्या कॉरिडॉरविषयी सर्वांच्या संमतीनेच कामे पूर्ण करण्यात येणार असल्याची माहिती श्री. गोरे यांनी दिली. जिल्हाधिकारी कुमार आशीर्वाद, जिल्हा परिषदेचे मुख्य कार्यकारी अधिकारी कुलदीप जंगम यांच्यासह अन्य अधिकारी सहभागी झाले होते. उपविभागीय अधिकारी सचिन इथापे यांनी प्रास्ताविक केले. मुख्याधिकारी महेश रोकडे यांनी आभार मानले.

सफाई मित्रांचा सन्मान

महास्वच्छता अभियानात सहभाग घेऊन स्वच्छता मोहीम राबवलेल्या काही सफाई मित्रांचा प्रातिनिधीक स्वरूपात पालकमंत्री गोरे यांच्या हस्ते सत्कार करण्यात आला. यामध्ये लक्ष्मण गोविंद सोनवणे, रविकिरण दोडिया, श्रीमती शांता विठ्ठल वाघमारे, अजय शंकर तावरे, ओंकार जनार्दन वाघमारे यांच्यासह कोळगाव ग्रामपंचायत श्रीगोंदा (जि. अहिल्यानगर) यांचाही विशेष सन्मान करण्यात आला.