Soyabean crop : एका रात्रीत सोयाबीन पडू लागले पिवळे

Nanded News : नांदेड जिल्ह्यातील सोयाबीन पिकावर बुरशीजन्य रोगाचे प्रमाण अधिक असल्याने पीक एका रात्रीत पिवळे पडत आहे. बुरशीचा प्रसार झपाट्याने होत असल्याने आज हिरवे दिसणारे सोयाबीन दुसऱ्या दिवशी पिवळे पडून वाळत आहे. हा प्रकार जिल्ह्याच्या सर्वच भागात असल्याने शेतकरी उत्पादन घटण्याच्या भीतीने धास्तावले आहेत.

जिल्ह्यात सर्वाधीक साडेचार लाख हेक्टर क्षेत्रावर सोयाबीनची पेरणी शेतकऱ्यानी केली आहे. मागील काही वर्षात नगदी पीक म्हणून शेतकरी सोयाबीन पिकाकडे वळले आहेत. निसर्गाच्या पाण्यावर अवलंबून असलेली शेती करताना शेतकऱ्यांना दरवर्षी वेगवेगळ्या समस्यांना सामोरे जावे लागत आहे. कधी अतिवृष्टीने तर कधी अनावृष्टीने या नगदी पिकांचे उत्पादन घटत आहे. यंदा पेरणी उशिरा झाल्याने पिकांची वाढ जेमतेम राहिली होती. अशातच मध्यंतरी पावसाने दडी मारल्याने पंधरा दिवसापेक्षा अधिक काळाचा पावसाचा खंड पडला होता. या अनेक समस्यांचा सामना करणाऱ्या‍ शेतकऱ्यांच्या सोयाबीनला यंदा बुरशीजन्य रोगाने गाठले आहे. जिल्ह्यात प्रारंभी काही ठरावीक भागात पीक पिवळे पडून वाळत होते. परंतु याचे प्रमाण झपाट्याने वाढत आहे. एका रात्रीत हिरवे दिसणारे सोयाबीनचे पीक दु‍सऱ्या दिवशी पिवळे पडून वाळत असल्याचे चित्र जिल्ह्याच्या सर्वच भागात दिसून येत आहे. परिणामी अपरिपक्व पिक वाळत असल्याने उत्पादनात मोठी घट येण्याच्या शक्यतेने शेतकरी धास्तावले आहेत. पिवळे पडणाऱ्या पिकावर उपाययोजना काय कराव्यात याबाबत तज्ज्ञ मार्गदर्शन करीत असलेतरी पिक पक्वतेचा शेवटचा टप्पा असल्याने शेतकरीही हतबल झाले आहेत.