Online Electricity Bill : सव्वातीन लाख ग्राहकांची वीजबिले ऑनलाइन

Solapur News : घरबसल्या वीजबिल भरण्याकडे महावितरणच्या ग्राहकांचा कल वाढला आहे. त्यामुळे बिल भरणा केंद्रासमोर रांगेत उभे राहण्याचे कष्ट व वेळ वाचत आहेत. जिल्ह्यात दरमहा सव्वातीन लाखांहून अधिक ग्राहक वीजबिल ऑनलाइन भरण्यास पसंती देत आहेत. ही संख्या एकूण ग्राहकांच्या ७१ टक्के इतकी आहे.

महावितरणच्या वीज ग्राहकांना www.mahadiscom.com या संकेतस्थळावर व मोबाईल ॲपद्वारे केव्हाही व कोठूनही आॅनलाइन वीजबिल भरता येते. वीजबिल ऑनलाइन भरल्यानंतर ग्राहकांना त्यांच्या नोंदणीकृत मोबाइलवर मेसेजद्वारे (संदेश) त्वरित पोहोच मिळते. संकेतस्थळावर बिलाचा इतिहास तपासल्यास वीजबिल भरणा तपशील व पावतीही उपलब्ध होते.

सवलतीमुळे ग्राहकांना प्रोत्साहन

महावितरणने लघुदाब ग्राहकांना वीजबिल ऑनलाइन भरण्यासह ई मेलद्वारे वीजबिल मिळविण्याची सुविधा उपलब्ध करून दिली. त्यासाठी १० रुपये सूट तर आॅनलाइन वीजभरणावर ०.२५ टक्के सवलतही दिली आहे. शिवाय बक्षीस योजनाही राबवली. त्यामुळे ग्राहकांना ऑनलाइन वीजबिल भरण्यास प्रोत्साहन मिळाले.

विभागनिहाय ऑनलाइन वीजबिल भरणा केलेल्या ग्राहकांची संख्या

अकलूज ३०,०८६

बार्शी ६५,१५८

पंढरपूर ६८,१८९

सोलापूर ग्रामीण ६०,६२३

सोलपूर शहर १,० ३,७६२

एकूण ३,२७,८१८

ग्रामीण भागातही वाढ

जिल्ह्यातील चार लाख ६० हजार ४६२ ग्राहकांनी वीजबिल भरले आहे. त्यापैकी एक लाख ३२ हजार ६४४ ग्राहकांनी २१ कोटी ९४ लाख ७६ हजार रूपये ऑफलाइन तर तीन लाख २७ हजार ८१८ ग्राहकांनी ८३ कोटी सात लाख ५१ हजार रुपये ऑफलाइन भरले आहेत.

विशेष म्हणजे ग्रामीण भागातही ऑनलाइन वीजभरणा वाढत आहे. सोलापूर शहरातील ऑनलाइन वीजभरणा ७४.६१ टक्के आहे. ग्रामीण भागातील विभागांची आकडेवारी पाहता ती ७१ ते ८४ टक्के आहे.