GATE 2025 : पंजाबराव देशमुख कृषी विद्यापीठाच्या विद्यार्थ्यांची उत्कृष्ट कामगिरी

Akola News : डॉ. पंजाबराव देशमुख कृषी विद्यापीठातील कृषी अभियांत्रिकी महाविद्यालयाच्या विद्यार्थ्यांची गेट (GATE 2025) या अखिल भारतीय स्तरावर घेण्यात येणाऱ्या परीक्षेत उत्कृष्ट कामगिरी केली आहे.

कृषी क्षेत्राच्या प्रगत आणि तांत्रिक विकासात कृषी अभियांत्रिकीचे योगदान मोलाचे आहे. या क्षेत्रातील विद्यार्थी तांत्रिक ज्ञान, संशोधन आणि नवोपक्रमाच्या माध्यमातून शेतीमध्ये आधुनिक तंत्रज्ञान वापर व त्याचे शिक्षण घेत आहेत.

नवनवीन तंत्रज्ञानाचा अवलंब करून शेतीचे यांत्रिकीकरण व समस्यांचे समाधान शोधत आहेत. याच दिशेने एक मोठे पाऊल उचलत डॉ. पंजाबराव देशमुख कृषी विद्यापीठाअंतर्गत कृषी अभियांत्रिकी आणि तांत्रिकी महाविद्यालयातील विद्यार्थ्यांनी GATE 2025 परीक्षेत उज्ज्वल यश मिळवत संस्थेच्या शैक्षणिक दर्जाचे दर्शन घडवले आहे.

या प्रतिष्ठित परीक्षेत उत्तीर्ण झालेल्या विद्यार्थ्यांनी अखिल भारतीय स्तरावर उल्लेखनीय रँक मिळवले आहेत. यात निखिल मडांकर देशातून १२ वा, प्रदीप कुमार ९२ व्या स्थानी, ध्रुव कुमार १३२, प्रज्वल देशमुख १४५, शेख फरहान खान १९० आणि शिवम कुमार २७४ व्या स्थानी राहिला आहे.

GATE ही देशातील एक अत्यंत स्पर्धात्मक परीक्षा असून या परीक्षेद्वारे विद्यार्थ्यांना देशातील नामांकित अभियांत्रिकी व संशोधन संस्थांमध्ये उच्च शिक्षणाची संधी मिळते. या विद्यार्थ्यांनी कठोर परिश्रम, अभ्यासातील सातत्य आणि उत्कृष्ट मार्गदर्शनाच्या मदतीने हे यश संपादन केले आहे. त्यांच्या या यशामुळे संपूर्ण महाविद्यालयाचा गौरव वाढला आहे.

महाविद्यालयाचे सहयोगी अधिष्ठाता डॉ. सुरेंद्र काळबांडे, विभाग प्रमुख डॉ. सुचिता गुप्ता, डॉ. म्हस्के व इतर प्राध्यापकांनी या गुणवंत विद्यार्थ्यांचे अभिनंदन करून त्यांच्या उज्ज्वल भविष्यासाठी शुभेच्छा दिल्या.