Agriculture Advice : संत्रा उत्पादनात सेंद्रिय कर्ब आणि घटकांचा वापर महत्त्वाचा; पाटील यांचे मत

Washim News : वाशीम जिल्ह्यात संत्र्याचे क्षेत्र वाढत आहे. दर्जेदार संत्रा उत्पादन घेताना जमिनीचा सेंद्रिय कर्ब, सेंद्रिय घटकांचा वापर महत्त्वाची भूमिका वठवतो, असे प्रतिपादन करडा कृषी विज्ञान केंद्राचे उद्यानविद्या विषय विशेषज्ञ निवृत्ती पाटील यांनी केले. केव्हीकेच्या पुढाकाराने जिल्ह्यातील दत्तक गाव वडजी येथे आयोजित मासिक फेरी व चर्चासत्रादरम्यान ते बोलत होते.

केव्हीकेच्या उद्यान विद्या विभागातर्फे रिसोड तालुक्यात संत्रा व हळद या पिकांवर गट शेती उपक्रमांतर्गत मासिक चर्चासत्र व शिवार फेरी गुरुवारी (ता. २६) झाली. कार्यक्रमाला प्रगतिशील संत्रा उत्पादक शेतकरी विलास बोरकर हे अध्यक्षस्थानी होते. पहिल्या सत्रात शिवार फेरीमध्ये डॉ. सुनील बोरकर यांच्या गोकृपा अमृत आधारित नैसर्गिक शेती पद्धतीअंतर्गत विकसित केलेल्या संत्रा बागेची तज्ज्ञ व शेतकऱ्यांनी पाहणी केली.

फळांची आणि पानांची तसेच संपूर्ण बागेची गुणवत्ता बघून समाधान व्यक्त केले. या बागेमधील नियोजनाचे बारकावे समजून घेतले. त्यानंतर नाना बोरकर, शिवाजी बोरकर, राजेश बोरकर, अंकुश बोरकर व गोपाल बोरकर यांच्या संत्रा बागांची पाहणी करून पुढील उपाय योजनांबद्दल पाटील यांनी मार्गदर्शन केले.

राजेश बोरकर यांच्या १०० टक्के गोकृपा अमृत नैसर्गिक शेती पद्धतीद्वारे विकसित केलेल्या हळद प्लॉटची पाहणी करण्यात आली. श्री. बोरकर यांनी लागवडी पासून ते आतापर्यंत संपूर्ण नियोजन व केलेल्या उपाययोजनांबद्दल शेतकऱ्यांना माहिती दिली.

तांत्रिक सत्रात निवृत्ती पाटील यांनी नैसर्गिक शेतीचे महत्त्व, पिकांची अन्न निर्मितीची प्रक्रिया व यामध्ये सेंद्रिय कर्ब व जिवाणू यांची महत्त्वाची भूमिका सविस्तरपणे मांडली. कार्यक्रमास वाशीमसह बुलडाणा जिल्ह्यातील हळद व संत्रा उत्पादक शेतकरी उपस्थित होते. कार्यक्रमाचे सूत्रसंचालन दीपक ईडोळे यांनी केले. तर गोविंद देशमुख यांनी आभार मानले.