Dam Water Level : नांदेडमधील प्रकल्पांना मोठ्या पावसाची प्रतीक्षा

Nanded News : जिल्ह्यात अद्याप मोठा पाऊस झाला नसल्याने नदी-नाल्यांना पाणी आले नाही. परिणामी नांदेड पाटबंधारे विभागातर्गत येणाऱ्या १०४ प्रकल्पांत केवळ ३५ टक्केच पाणीसाठा शिल्लक राहिला आहे, अशी माहिती नांदेड पाटबंधारे विभागाकडून देण्यात आली.

नांदेड जिल्ह्यात सध्या पावसाने हजेरी लावली असलीतरी ती पेरणी योग्य असल्याने शेतकऱ्यांनी पेरण्यांची कामे आटोपून घेतली. परंतु मोठा पाऊस अद्याप झाला नाही. यामुळे नदी-नाल्यांना पाणी आले नाही. परिणामी जिल्ह्यातील एकाही प्रकल्पात पाणीसाठा झाला नाही.

उलट नांदेड शहराला पाणी पुरवठा करणाऱ्या विष्णुपुरी प्रकल्पात सध्या केवळ १८.७६ दशलक्ष घनमीटरनुसार केवळ २३.२३ टक्के पाणीसाठा शिल्लक आहे. आजघडीला दुसरा मोठा प्रकल्प असलेल्या मानार (बारुळ) प्रकल्पात ७१.७५ दलघमीनुसार ५१.९१ टक्के पाणीसाठा आहे.

यासोबतच जिल्ह्यातील नऊ मध्यम प्रकल्पात ४४.७८ दलघमीनुसार ३२.२० टक्के पाणीसाठा आहे. चार कोल्हापुरी बंधाऱ्यात ०.०१ दलघमीनुसार ०.१३ टक्के पाणीसाठा आहे. ८० लघू प्रकल्पात ३९.२५ दलघमीनुसार २२.७१ टक्के पाणीसाठा आहे. नऊ उच्च पातळी बंधाऱ्यात ७८.११ दलघमीनुसार ४१.१५ टक्के पाणीसाठा आहे. जिल्ह्यात एकूण १०४ प्रकल्पात २५२.६६ दशलक्ष घनमीटरनुसार ३४.७० टक्के पाणीसाठा शिल्लक आहे.

यासोबतच नांदेड जिल्ह्याशेजारी असलेल्या परभणी जिल्ह्यातील येलदरी प्रकल्पात ४०३.२४ दलघमीनुसार ४९.८० टक्के पाणीसाठा आहे. तर सिद्धेश्‍वर प्रकल्पात १६.६३ दलघमीनुसार २०.५४ टक्के पाणीसाठा आहे. तसेच यवतमाळ जिल्ह्यातील ऊर्ध्व पैनगंगा (इसापूर) या प्रकल्पात ४१९.०८ दलघमीनुसार ४३.४७ टक्के पाणीसाठा शिल्लक आहे, अशी माहिती नांदेड पाटबंधारे मंडळ विभागाकडून देण्यात आली.

नांदेड पाटबंधारे मंडलांतील प्रकल्पनिहाय पाणीसाठा

प्रकल्प दलघमी टक्के

विष्णुपुरी १८.७६ २३.२३

मानार ७१.७५ ५१.९१

मध्यम प्रकल्प(९) ४४.७८ ३२.२०

लघू प्रकल्प (८०) ३९.२५ २२.७१

उच्चपातळी बंधारे (९) ७८.११ ४१.१५

एकूण प्रकल्प १०४ २५२.६६ ३४.७०

जिल्ह्याशेजारील प्रकल्प

येलदरी ४०२.२४ ४९.८०

सिद्धेश्‍वर १६.६३ २०.५४

इसापूर ४१९.०८ ४३.४७