Sugarcane Fire : शिरूर येथे एक एकर ऊस जळून खाक

Pune News : येथील सूरज नामदेव यादव यांचा गट क्रमांक २१८ मधील एक एकर ऊस शॉर्टसर्किटमुळे जळून खाक झाला. हा प्रकार रविवारी (ता. १२) दुपारी साडेचारच्या सुमारास घडला. यात शेतकऱ्याचे तब्बल २ लाख रुपयांचे नुकसान झाले.

कुरुळी वडगाव शिव रस्त्यालगत सूरज यादव यांचा दीड एकर ऊस आहे. दुपारी साडेचार वाजता शॉर्टसर्किटमुळे अचानक ही आग लागली. धुराचे प्रचंड लोट सुरू झाल्याने गावातील नागरिकांनी जळणाऱ्या उसाकडे धाव घेतली.

आगीचा वेग जोरात असल्याने आग आटोक्यात आणणे शक्य झाले नाही. यात शेतकरी सूरज यादव यांचा एक एकर ऊस जळून खाक झाला. आता उसाचे पीक ऐन तोडणीस आले असताना विजेच्या शॉर्टसर्किटमुळे जळून खाक झाल्याने नुकसानग्रस्त शेतकऱ्यांना भरपाई मिळण्याची मागणी केली जात आहे.

यादव यांच्या शेतात मोठ्या प्रमाणात विद्युत वाहक तारांचे जाळे आहे. या वीजवाहक तारा जीर्ण झाल्या असून त्या वारंवार तुटतात. विद्युत वाहक तारांना अनेक ठिकाणी जोड देण्यात आले आहेत.

दरम्यान या अगोदर शॉर्टसर्किटमुळे चार वेळा यादव यांचा ऊस पेटला आहे. महावितरणकडे वारंवार दुरुस्तीची मागणी करूनही त्याकडे दुर्लक्ष केल्याने उसाचे नुकसान झाल्याचा आरोप शेतकरी सूरज यादव यांनी केला आहे.