Akola Fertilizer Warehouse Raid : धाडीतील अधिकाऱ्यांना पुण्यात येण्याचे फर्मान

Akola News : गेल्या काही दिवसांपासून राज्यभर गाजत असलेल्या अकोला येथील कृषी निविष्ठा साठवणूक गोदाम तपासणी प्रकरणी आज (ता.१७) तातडीने कृषी आयुक्तालयात बैठक आयोजित करण्यात आली आहे.

या धाड सत्रात सहभागी कृषी खात्यातील संबंधित सर्व तंत्र अधिकाऱ्यांना अहवाल व कागदपत्रांसह हजर राहण्याचे स्पष्ट निर्देश देण्यात आले आहेत.

अकोल्यातील एमआयडीसी परिसरात असलेल्या विविध कंपन्यांच्या गोदामांची ७ ते ९ जून या काळात धडक तपासणी करण्यात आली.

या प्रकरणातील गोंधळ व सरकारवर होत असलेली टीका पाहता मुंबईत मुख्यमंत्री, उपमुख्यमंत्र्यांनी कृषिमंत्र्यांना विचारणा केल्याचेही समोर आले. दुसरीकडे अकोल्यातील साठवणुकदार आता या खासगी व्यक्तींविरुद्ध पोलिस कारवाईसाठी एकवटले आहेत. अशातच या तपासणीत सहभागी सर्व अधिकाऱ्यांना तातडीने कृषी आयुक्तालयात बोलविण्यात आले आहे.

कृषी आयुक्तांच्या अध्यक्षतेखाली आज ही बैठक होत आहे. या बैठकीस अकोला येथील स्थानिक निरीक्षकांसह सर्व संबंधित अधिकारी व कर्मचाऱ्यांनी उपस्थित राहावे. बैठकीत अनुपस्थित राहण्यासंदर्भातील कोणतीही सबब ऐकून घेतली जाणार नाही, असे या अधिकाऱ्यांना सांगण्यात आले आहे.