Sugarcane FRP : पहिल्या हप्त्याचा तिढा ‘जैसे थे’च

Nanded News : ऊसाच्या दराबाबतचा तिढा सोडवण्यासाठी व उत्पादक शेतकऱ्यांच्या विविध मागण्यासाठी साखर कारखानदार, शेतकरी प्रतीनिधी व ऊस उत्पादक शेतकरी यांची जिल्हाधिकारी अभिजित राऊत यांच्या उपस्थितीत बैठकीचे आयोजन शुक्रवारी करण्यात आले होते.

पण कारखान्याकडून कुठलीच सकारात्मकता दाखवली नसल्यामुळे ऊस दर आणि पहिली उचल याबाबत कुठलाच तोडगा निघाला नाही. जिल्हाधिकारी यांनी पुढील बैठक (ता.१३) डिसेंबरला आयोजित केली आहे. त्यामुळे येणाऱ्या बैठकीत ऊस उत्पादकांच्या मागणीकडे दुर्लक्ष झाल्यास शेतकऱ्यांनी आंदोलनाचा इशारा दिला आहे.

पहिली उचल तीन हजार तीनशे देण्यात या प्रमुखसह अन्य मागण्यांसाठी ऊस उत्पादक शेतकरी संघर्ष समिती संघर्षाचा तयारीत आहेत. मराठवाड्यातील बहुतांश कारखानदारांनी पहिली उचल अडीच हजार जाहीर केली असून त्याप्रमाणे ऊसाचे देयके अदा करण्यात येत आहेत. यंदाचा गाळप हंगाम सुरू होऊन महिना झाला असून अद्याप ऊसाच्या दराबाबत तोडगा न निघाल्याने शेतकरी संघटना व ऊस उत्पादक शेतकरी संघर्षाच्या पवित्र्यात आहेत.

नांदेड जिल्ह्यातील शेतकरी, शेतकरी संघटना, सर्वपक्षीय नेत्यांची एक बैठक काही दिवसांपूर्वी पार पाडली. या बैठकीत ऊसदरासाठी तिव्र आंदोलन करण्यात निर्धार करण्यात आला. या आंदोलनाचा पहिला टप्पा म्हणून जिल्ह्याधिकाऱ्यांना मागणीचे निवेदन देण्यात आले होते.

या निवेदनाची दखल घेऊन कारखाना प्रशासन व शेतकरी संघटना व ऊस उत्पादक शेतकऱ्यांच्या बैठकीचे शुक्रवारी आयोजन करण्यात आले होते. या बैठकीला जिल्हाधिकारी अभिजित राऊत, नांदेड विभागाचे साखर प्रादेशिक सहसंचालक, विविध कारखान्याचे कार्यकारी संचालक तथा प्रतिनिधी उपस्थित होते.