Jitendra Awad : राज्यातील महायुती सरकार वास्तववादी भान असणारे नाही; आव्हाड यांची कॅगच्या अहवालानंतर टीका 

Pune News : राज्याच्या पावसाळी अधिवेशनात शुक्रवारी (ता. १२) विधीमंडळात जमा आणि खर्चाचा अहवाल पटलावर ठेवण्यात आला. यानंतर भारताचे नियंत्रक आणि महालेखा परीक्षक (कॅग) ने यावर अहवालातून ताशेरे आढले आहेत. त्यानंतर आता विरोधकांच्या निशाण्यावर राज्यातील महायुती सरकार आले आहे. कॅगच्या अहवालावरून राष्ट्रवादी काँग्रेस शरदचंद्र पवार पक्षाचे नेते आमदार जितेंद्र आव्हाड यांनी सरकारवर जोरदार टीका केली आहे. आव्हाड यांनी राज्यातील महायुती सरकार हे वास्तववादी भान हरवलेलं सरकार असल्याचे म्हटले आहे. आव्हाड यांनी ही टीका शनिवारी (ता.१३) मुंबईत पत्रकार परिषदेत केली.

कॅगने आपल्या अहवालात राज्याच्या जमा आणि खर्चातील तफावत असल्याचे म्हटले आहे. हा अहवाल ३१ मार्च २०२२ रोजी संपलेल्या वर्षाचा आहे. सरकारच्या आर्थिक बेशिस्तीमुळे राज्याच्या तिजोरीवरील आर्थिक ताण वाढत असल्याचे कॅगने म्हटले आहे. तसेच राज्याचे उत्पन्नाचे आर्थिक स्त्रोत वाढवावेत अशी शिफारस देखील कॅगने राज्य सरकारला केली आहे.  

यावरून राज्यातील महायुती सरकारला वास्तवाचे भान नसून कर्जात राज्य बुडत आहे. सध्या राज्यावरील कर्ज दुपट्टीने वाढल्याचा अहवाल कॅगने दिल्याचे आव्हाड यांनी म्हटलं आहे. तसेच महसुली जमा आणि खर्च यांच्यातील वाढत चाललेल्या तफावतीमुळेच सरकारी तिजोरीवर भार वाढत असल्याचे कॅगने ताशेरे ओढत निरीक्षण नोंदवले आहे. त्यामुळे राज्यातील महायुतीच्या ट्रिपल इंजिन सरकारला वास्तवाचे भान नाही. हे सरकार वास्तववादी भान हरवलेलं सरकार असल्याचे आव्हाड म्हणाले. 

पुढे आव्हाड म्हणाले की, राज्य सरकारकडून राज्यातील विविध संस्थांना ५०,००० कोटीचा निधी दिला गेला आहे. निधी कोणाला किती आणि कधी दिला याचा ताळमेळच कॅगला लागत नाही. जर कॅगलाच ताळमेळ बसत नसत नसेल तर सर्वसामान्य मराठी माणसाला तरी काय कळणार? असा टोला आव्हाड यांनी लगावला आहे. 

राज्याच्या तिजोरीतील ५० हजार कोटी गोरगरीब, कष्टकरी माणसाच्या खिशातले आहेत. जे विविध मंडळांना वाढण्यात आले. यावरूनच कॅगने निरीक्षण नोंदवले. मागील ६४ वर्षात आजपर्यंत असे कधीच झाले नसल्याने ही गंभीर बाब असल्याचे, जितेंद्र आव्हाड यांनी सांगितले आहे.