Water Shortage : नांदगावला टॅंकरच्या पाण्यावरच भिस्त

Nandgaon News : नांदगाव ः तालुक्यात एकीकडे दुष्काळाचे संकट गहिरे होत असताना दुसरीकडे पिण्याच्या पाण्यासाठी होणारी पायपीट थांबण्याचे नाव घेत नाही. तालुक्यातील नळ योजनांची  स्थिती नाजूक असल्याने सगळी भिस्त आता टॅंकरवरच राहणार आहे, हे निश्चित.

मात्र, या टँकरमधून करण्यात आलेला पाणीपुरवठा अशुद्ध असून, पाण्याला खूपच दुर्गंधी असते. असे असूनही भूजल सर्वेक्षण आणि विकास यंत्रणेच्या प्रयोगशाळेने टँकरचे पाणी शुद्ध ठरविले आहे.

ग्रामीण भागातील महिला पिण्याच्या पाण्यासाठी आजूबाजूच्या विहिरी शोधण्यासाठी पायपीट करत आहेत, त्यांचा तो नित्यक्रम बनला असून टँकरचे पाणी पिण्यासाठी वापरले नाही तरी अन्य कारणांसाठी देखील वापर केला जात नाही.

नाग्यासाक्या धरणात सध्या मृतसाठा शिल्लक असला तरी त्याचीही पातळी दिवसेंदिवस कमी होत आहे. सध्या हा साठाही जूनपर्यत पुरविण्याचे आव्हान यंत्रणेपुढे आहे. भूजल प्रयोगशाळेत वास येणारे पाणी शुद्ध ठरत असल्याने त्यांच्या या संशोधनाबद्दल आश्चर्य व्यक्त होत आहे.

तालुक्याच्या आरोग्य विभागाकडे अशुद्ध पाणी पुरवठ्यातून उद्भवणाऱ्या संभाव्य साथीचा प्रश्न उभा राहण्याची भीती तर भूजल पाण्याचे नमुने योग्य ठरवीत आहे. टँकरमधील पाणी शुद्ध व निर्जंतूक आहे का, याची तपासणी कशी केली जाते?  याचे उत्तर प्रशासनाकडे नाही. आम्ही टीसीएल टाकतो असा बचावावात्मक पवित्रा घेतला जात आहे.

याअनुषंगाने केला जात असला तरी शास्त्रोक्त पद्धतेीने पाण्यात पाणी निर्जंतूक करण्यासाठी क्लोरिन टाकले पाहिजे, टँकरमधील पाणी परीक्षानळीत घेऊन या पाण्यात ओटी (ऑर्थो टोलुडीन) नावाचे एक सोल्यूशन टाकले जाते. पाण्यात क्लोरिन टाकले असेल, तर या पाण्याचा रंग बदलतो.

...तर ‘गिरणा’चे पाणी उचलणार
सध्या एकूण टँकरची वाढती मागणी लक्षात घेता नाग्यासाक्या धरणाजवळ बुडक्या घेण्याचे नियोजन असल्याची माहिती गटविकास अधिकारी गणेश चौधरी यांनी दिली.

गरज पडल्यास ‘गिरणा’चे पाणी उचलण्यासाठी प्रयत्न करू, असे त्यांनी सांगितले. एकूणच सध्या दुष्काळाच्या  संकटात यंत्रणेने अलर्ट होण्याची आवश्यकता आहे.