Farm Road Issue : नायब तहसीलदारांची थेट शेतीच्या बांधावर सुनावणी

Amravati News : तिवसा महसूल विभागातील पाचही मंडळाच्या कामकाजाची धुरा हाती घेताच नायब तहसीलदार आशिष नागरे यांनी ३३ प्रकरणातील सात रस्ता अडवणूक प्रकरणांची थेट शेतकऱ्यांच्या बांधावर जाऊन सुनावणी केली. आठ दिवसांत ही प्रकरणे त्यांनी मार्गी लावली. त्यामुळे शेतकऱ्यांना दिलासा मिळाला आहे.

गेल्या दोन -तीन वर्षांपासूनची रस्त्याची प्रकरणे तहसील कार्यालयात सुनावणीवर असल्यामुळे तालुक्यातील किती तरी शेतकऱ्यांना आपल्या शेत जमिनीवर उत्पन्न घेता येत नाही. परिणामी, शेतकऱ्यांमध्ये मोठे वाद निर्माण होताना दिसून येतात.

घोटा येथील शेतकरी निरंजन दवाळे यांच्या दोन एकर शेतात जाण्याकरिता येथील गैरअर्जदार हे अडवणूक करत होते. त्यामुळे त्यांनी दोन वर्षांआधी कायमस्वरूपी शेतीतून वहिवाट रस्ता मिळावा अशा मागणीचा अर्ज तहसीलदार यांच्याकडे केला होता. प्रकरणात दोन वर्षांपासून दिलासादायक निकाल मिळाला नाही.

परिणामी यामध्ये अनेकदा वादही झाले. मात्र नायब तहसीलदार आशिष नागरे यांनी जबाबदारी घेताच रस्ता अडवणुकीच्या प्रकरणाची तातडीने सुनावणी व शेतकऱ्यांची मध्यस्थी करून आठ दिवसांत सात प्रकरणाचा शेतीच्या बांधावर ताबडतोब निकाल दिला.

त्यामुळे तालुक्यातील शेतकऱ्यांना मोठा दिलासा मिळत असून शेतकऱ्यांकडून देखील समाधान व्यक्त केले जात आहे. घोटा येथील शेतीच्या बांधावर सुनावणी करताना मंडळ अधिकारी प्रशांत जायदे, तलाठी चरणसिंग दुलत, महसूल सहायक राहुल निस्वादे व शेतकरी अर्जदार, गैर अर्जदार उपस्थित होते.