Crop Damage Compensation : बहूजमीनधारक शेतकरी पीक नुकसानीच्या मदतीपासून वंचित

Akola News : जिल्ह्यात जुलै महिन्यात झालेल्या अतिवृष्टीमुळे शेतकऱ्यांचे खूप मोठ्या प्रमाणात नुकसान झाले होते. त्याचे पंचनामे करून शेतकऱ्यांना शासनाने मदत जाहीर केली. यामध्ये बहू जमीनधारणा क्षेत्रधारक शेतकऱ्यांना फक्त एकाच शेतातील नुकसानीसाठी मदत मिळाली आहे.

इतर गट नंबरमधील मदत मिळण्यासाठी अडचणी येत आहेत. याबाबत जिल्हा प्रशासनाने पाठपुरावा करावा, अशी मागणी गोपाल पोहरे, राम पोहरे यांनी शासनाकडे केली आहे.

निवेदनानुसार, जिल्ह्यातील हजारो शेतकऱ्यांच्या जमिनी एकापेक्षा अधिक शिवार, महसूल मंडलांत आहेत. शासनाद्वारे देण्यात येणारी नैसर्गिक आपत्तीची मदत ही आधार प्रमाणीकरण करून दिली जाते.

एका शेतकऱ्याच्या जमिनी वेगवेगळ्या शिवारामध्ये असतील तर त्यातील फक्त एकाच जमिनीला मदत भेटत आहे. मात्र शासनाच्या तीन हेक्टर मर्यादेचा लाभ शेतकऱ्यांना देण्यात ही बाब अडचणीची ठरते आहे.

परिणामी शेतकऱ्यांना तसेच अधिकाऱ्यांनाही नाहक त्रास सहन करावा लागतो आहे. वेगवेगळ्या महसूल मंडलांतील शिवारात जमिनी असलेल्या सर्व शेतकऱ्यांना तीन हेक्टरच्या मर्यादेत लाभ देण्यासाठी योग्य तो पाठपुरावा करावा, अशी मागणी सोमवारी (ता. ८) करण्यात आली आहे.