River Pollution : इंद्रायणी नदीच्या प्रदूषणावर पुणे येथे २६ डिसेंबरला बैठक

Nagpur News : इंद्रायणी नदीमध्ये मिसळत असलेले सांडपाणी ही गंभीर समस्या असून त्यामुळे नदी प्रदूषित झाली आहे. हा प्रश्‍न निकाली काढण्यासाठी नगरपालिका, महापालिका, ग्रामपंचायती यासह इतर सर्व प्रशासनासोबत मंगळवारी (ता. २६) पुण्यात बैठक आयोजित करण्यात आली आहे.

या बैठकीत नदी प्रदूषण मुक्‍त करण्यावर मंथन होईल व निश्‍चित तोडगा काढला जाईल, असा विश्‍वास मंत्री दीपक केसरकर यांनी मंगळवारी (ता. १९) विधान परिषदेत व्यक्‍त केला.

विधान परिषद सदस्या उमा खापरे यांनी या संदर्भाने उपस्थित केलेल्या प्रश्‍नाच्या उत्तरात ते बोलत होते. श्री. केसरकर म्हणाले की, इंद्रायणी नदी पुणे, पिंपरी चिंचवड, महापालिका तसेच काही ग्रामपंचायतीमधून वाहते. ओढ्याच्या माध्यमातून या शहरी वस्त्यांमधील सांडपाणी नदीत मिसळते. औद्योगिक प्रकल्पातील पाणीही नदीत येते. परंतु हे पाणी एचटीपीच्या माध्यमातून प्रक्रिया केलेले आहे.

शहरी सांडपाण्याचा प्रश्‍न सोडविण्यासाठी ते डायव्हर्ट करुन एचटीपीमध्ये सोडणे अशा उपाय योजना पहिल्या टप्प्यात केल्या जाणार आहेत. नदीत फेस येत होता. एका कंपनीचे वाशीगचे मोठे युनिट बंद करुन त्यांनाही एचटीपी यंत्रणा बसविण्यास सांगितले आहे. त्यामुळे आता नदीत फेस येणार नाही.

लोणावळा, तळेगाव, आळंदी, देहू, देहू कटक मंडळ आणि वडगाव तसेच अनेक ग्रामपंचायती या सर्वांचा एकत्रित प्लॅन तयार करण्यात आला आहे. समिती तयार करता येईल का? याविषयी देखील चाचपणी केली जात आहे.

नदी प्रदूषण मुक्‍तीसाठी निधीची तरतूद देखील करण्यात आल्याचे दीपक केसरकर यांनी सांगितले. दरम्यान १५ जानेवारी पर्यंत या संदर्भाने योग्य भूमिका घेण्याची सूचना सभापती निलम गोऱ्हे यांनी केली.

खापरे यांनी विचारला प्रश्‍न...

इंद्रायणी काठी लागली समाधी ज्ञानोबाची, अशा ओळी गायल्या जातात. परंतु आता इंद्रायणी प्रचंड प्रदूषित झाली असून तिच्या काठावर थांबणेही दुरापास्त होत आहे. पाण्यावर मोठा प्रदूषित फेस येत आहे, अशा प्रश्‍न उमा खापरे यांनी केला होता.