Manoj Jarange : मनोज जरांगे पाटील यांच्या समर्थनार्थ मराठा समाज रस्त्यावर

Maharashtra News : मराठा समाजाला आरक्षण मिळण्याच्या मागणीसाठी मनोज जरांगे यांनी सुरू केलेले उपोषण गुरुवारी (ता. २६) दुसऱ्या दिवशीही सुरूच होते. दरम्यान राज्यभरात विविध जिल्ह्यांमध्ये श्री. जरांगे यांच्या उपोषणाच्या समर्थनार्थ विविध माध्यमातून पाठिंबाही सुरूच आहे.

मराठा क्रांती मोर्चाच्या वतीने आंदोलनाची तीव्रता वाढविण्याचा निर्णय घेतला अनेक गावांमध्य पुढाऱ्यांना गावबंदीचे फलक लागले आहेत. तसेच अनेक ठिकाणी जिल्हाधिकारी कार्यालयासमोर मराठा आंदोलकांचे साखळी उपोषण सुरू आहे.

मराठा समाजाला आरक्षण मिळावे म्हणून अंतरवाली सराटी येथे मनोज जरांगे यांनी याआधी २९ ऑगस्टपासून बेमुदत उपोषण सुरू केले होते. थेट मुख्यमंत्र्यांनी मराठा आरक्षणाविषयी सरकार सकारात्मक असून वेळेची मागणी करत उपोषण सोडण्याची विनंती केली होती. त्यानुसार उपोषण मागे घेत श्री. जरांगे यांनी सरकारला ४० दिवसांचा वेळ दिला होता. या वेळेत मराठा आरक्षणाविषयी सरकारकडून ठोस निर्णय न झाल्याने बुधवारपासून (ता. २५) जरांगे पाटील यांनी अंतरवाली सराटी येथे अन्न, जल त्याग बेमुदत उपोषण सुरू केले आहे.

त्यांनी उपोषण सुरू केल्यानंतर शासनाचे प्रतिनिधी म्हणून अंबडचे तहसीलदार चंद्रकांत शेळके यांनी बुधवारी रात्री साडेसातच्या सुमारास अंतरवाली सराटी येथे मनोज जरांगे यांची भेट घेतली. या वेळी शेळके यांनी शासन आपल्या मागणीवर गांभीर्याने विचार करत आहे. आपण बेमुदत उपोषण थांबवा म्हणून लेखी पत्र देत विनंती केली. या वेळी जरांगे पाटील यांनी सांगितले, की जोपर्यंत मराठा समाजाला आरक्षण मिळत नाही तोपर्यंत बेमुदत उपोषण मागे घेतले जाणार नाही.

जरांगे पाटील यांनी आरक्षणाच्या मागणीबाबत भूमिका स्पष्ट केल्यानंतर मराठवाड्याच्या विविध भागांत जरांगे यांच्या मागणी व उपोषणाच्या समर्थनार्थ मराठा समाज बांधवांच्या वतीने ठिय्या आंदोलन, कुठे टॉवरवर चढून आंदोलन, कुठे साखळी उपोषण, कुठे राजीनामे देण्याची प्रक्रिया आदी मार्गाने आंदोलने करण्यात येत आहेत. जालना जिल्ह्यासह राज्यात सर्वच पक्षाच्या नेत्यांना गावबंदी करण्यात येत आहे.