Mahavitaran Wallet : महावितरणचे पन्नास ‘वॉलेटधारक’

Solapur News : वीजबिलाचा भरणा अधिक सुलभ व्हावा, यासाठी महावितरणने स्वतःचे ‘पेमेंट वॉलेट’ आणले आहे. वॉलेटधारकांना प्रतिबिलामागे पाच रुपये कमिशन दिले जात आहे. सध्या जिल्ह्यात ५० वॉलेटधारक आहेत. तर महावितरणने वीजबिल भरणा केंद्रांनाही वॉलेटचा वापर करण्याच्या सूचना दिल्या आहेत.

महावितरण वॉलेट म्हणजे महावितरण कंपनीची एक डिजिटल पेमेंट सुविधा आहे. या सुविधेद्वारे ग्राहक त्यांच्या वीजबिलाचा भरणा ऑनलाइन करू शकतात. वॉलेटधारक ॲपमध्ये नोंदणी करून महावितरणच्या ग्राहकांकडून वीजबिलाचा भरणा करून घेऊ शकतात.

वॉलेटमध्ये बिलाचा भरणा झाल्यानंतर संबंधित ग्राहकाच्या नोंदणीकृत मोबाईलवर बिलाचा भरणा झाल्याचा संदेश तत्काळ मिळेल. एकाच वॉलेटचा ‘बॅलन्स’ वापरून विविध ‘लॉग इन’द्वारे वेगवेगळ्या व्यक्तींकडून वीजबिलाचा भरणा करून घेण्याची सुविधा वॉलेटमध्ये उपलब्ध आहे.

कागदपत्रांसह करा अर्ज

वॉलेटधारक होण्यास इच्छुक असलेल्यांनी आधार कार्ड, पॅन कार्ड, पत्त्याचा पुरावा, पासपोर्ट फोटो, रद्द केलेला धनादेश, वीजबिल, भाडे करारनामा आदी आवश्‍यक कागदपत्रांसह महावितरणच्या उपविभागीय कार्यालयात अर्ज करावा. अधिक माहितीसाठी वित्त व लेखा व्यवस्थापक अनघा केसकर यांच्याशी संपर्क साधावा.

वीजबिल भरणा केंद्रांतही वॉलेट

वीजबिल भरण्यासाठी महावितरणने बँका, पोस्टसह खासगी पेमेंट एजंटांना परवानगी दिली आहे. या वीजबिल भरणा केंद्रांवरही महावितरण वॉलेटचा वापर करण्याच्या सूचना देण्यात आल्या आहेत.

एक लाख रुपयांपर्यंत सुविधा

वॉलेटमध्ये किमान पाच हजार रुपयांपासून कमाल एक लाख रुपयांपर्यंत पैसे भरण्याची सुविधा आहे. अर्जदाराच्या अर्जासह जागेची पडताळणी झाल्यावर महावितरणकडून त्याला मंजुरी दिली जाते. डेबिट व क्रेडिट कार्ड, ऑनलाइन बँकिंगद्वारे वॉलेट रिचार्ज करण्याची सोय उपलब्ध आहे. वॉलेट वापरण्यास सोपे असून, याद्वारे केलेले व्यवहार सुरक्षित असतात.