Mahanand Dairy : ‘महानंद’ अखेर ‘एनडीडीबी’कडे

Mumbai News : आर्थिक गाळात अडकलेल्या ‘महानंद’चे अखेर राष्ट्रीय दुग्ध विकास मंडळाकडे पाच वर्षांसाठी हस्तांतर करण्यात आले. एनडीडीबीचे अनिल हातेकर यांची व्यवस्थापकीय संचालक म्हणून नियुक्ती करण्यात आली असून ते ११ मे रोजी कार्यभार स्वीकारणार आहेत.

राज्य सरकारने महानंदच्या पुनरुज्जीवनासाठी राष्ट्रीय दुग्ध विकास मंडळाकडे हस्तांतर करण्याचा निर्णय मार्च महिन्यात घेतला होता. यासाठी २५३ कोटी ५६ लाख रुपये देण्यात येतील, असाही मंत्रिमंडळ निर्णय घेतला होता.

सध्या महानंदचे हस्तांतर झाले असले तरी पुनरुज्जीवनासाठी देण्यात येणारी रक्कम अद्याप हस्तांतरित करण्यात आलेली नाही. पुढील पाच वर्षांपैकी पाच महिने सरकारच्या दिरंगाईमुळे वाया गेले असून जी रक्कम मंजूर झाली आहे, ती मिळण्यासाठी ऑगस्ट उजाडणार असल्याचे समजते.

महानंद व एनडीडीबी यांच्यात करारनामा झाला असून पुढील पाच वर्षे महानंदचा कारभार एनडीडीबीकडे असेल. सध्या महानंदची आर्थिक परिस्थिती बिकट झाली असून, कर्मचाऱ्यांचे सात महिन्यांचे पगार थकले आहेत. तसेच दूध संघांनी केलेल्या दुधपुरवठ्याची दोन देयके (पगार) थांबले आहेत.

महानंदला केला जाणारा दूध पुरवठा ५४ हजार लिटरवर आला असून पगारावरील भार साडेचार कोटींचा प्रतिमहिना आहे. सध्या महानंदकडील ५३० कर्मचाऱ्यांनी स्वेच्छा निवृत्तीसाठी अर्ज केले आहेत.