Lumpy Skin Disease : ‘लम्पी स्कीन’ आजाराचा ५२ जनावरांना प्रादुर्भाव

Satara News : ऐन पावसाळ्यात जिल्ह्यात पुन्हा एकदा जनावरांच्या ‘लम्पी स्कीन’ आजाराचा प्रादुर्भाव वाढू लागला आहे. सातारा, खटाव, फलटण, कोरेगाव व माण तालुक्यांतील ५२ जनावरे ‘लम्पी स्कीन’ या आजाराने बाधित आहेत. लम्पीच्या पार्श्वभूमीवर पशुसंवर्धन विभाग सतर्क झाला असून, विविध उपाययोजना राबवण्यास सुरुवात करण्यात आली आहे.

सातारा जिल्ह्यात मे महिन्यापासून पावसाळी वातावरण आहे. त्यामुळे जनावरांमध्ये या आजाराचा जिल्ह्यात प्रादुर्भाव दिसत आहे. त्यामुळे जिल्हा परिषदेसह राज्य शासनाचा पशुसंवर्धन विभाग सतर्क झाला आहे. पशुसंवर्धन विभागाने सातारा जिल्ह्यात युद्धपातळीवर लसीकरण मोहीम राबविली आहे. लसीकरणात जी जनावरे चुकली आहेत, त्या ठिकाणी पुन्हा प्राधान्याने लसीकरण मोहीम राबविली जात आहे.

जिल्ह्यातील सातारा तालुक्यात १४, खटाव ८, फलटण ५, कोरेगाव १८, माण ७ असे मिळून ५२ जनावरे लम्पी आजाराने बाधित झाली आहेत. बाधित जनावरांवर पशुसंवर्धन विभागामार्फत औषधोपचार करण्यात येत आहेत. आजाराची लक्षणे आढळल्यास पशुवैद्यकीय अधिकाऱ्याकडूनच जनावरांची तपासणी करून घ्यावी. आजारी आणि निरोगी जनावरांना एकत्र बांधू नये.

या आजाराचा प्रसार कीटकामार्फत होत असल्यामुळे कीटकांवर नियंत्रण ठेवण्यासाठी गोठा आणि परिसरात स्वच्छता ठेवणे गरजेचे आहे. निर्जंतुक द्रावणाने फवारणी करावी. आजारी आणि निरोगी जनावरांच्या पिण्याच्या पाण्याकरिता व चारा खाण्यासाठी स्वतंत्र व्यवस्था करावी. याचबरोबर आजाराची लक्षणे आढळल्यास पशुसंवर्धन विभागाशी संपर्क साधावा.