Almatti Dam : अलमट्टीची उंची वाढवण्यावरून स्थानिकांचाच विरोध; १ लाख ३३ हजार हेक्टर जमिनीच्या संपादनाचे आव्हान

Almatti Dam Karnataka : कर्नाटक सरकारने अलमट्टी धरणाची उंची वाढविण्याच्या हालचाली सुरू केल्या आहेत. मात्र, अलमट्टी धरण प्रशासनाला अनेक अडचणींना सामना करावा लागणार आहे. उंची वाढवण्याआधी कर्नाटकातील विजापूर आणि बागलकोट जिल्ह्यांतील ७० हजार एकरसह एकूण १ लाख ३३ हजार हेक्टर जमिनीचे संपादन करावे लागणार आहे. त्यामुळे अलमट्टीची उंची वाढविली जात असलेली चर्चा हवेत विरणार अशी स्थिती निर्माण झाली आहे.

सध्या २८ हजार एकर जमीन संपादित झाली असून, या जमीन संपादनाविरुद्धही काही नागरिक न्यायालयात गेले आहेत. अलमट्टी धरणातील पाणीसाठ्यामुळे कोल्हापूर-सांगली जिल्ह्याला पुराचा फटका बसतो, असा एका समितीने अहवाल सरकारसमोर मांडला आहे. यातच कर्नाटक सरकारकडून या धरणाच्या उंचीसह पाणीसाठा वाढविण्याची मागणी केली जात आहे.

अलमट्टी धरण अधीक्षक अभियंता व्ही. आर. हिरगौडकर म्हणाले की, "कर्नाटकातील अलमट्टी धरणाची उंची वाढवण्यासाठी भूसंपादन करावे लागणार आहे. हे काम अद्यापही सुरूच आहे. सरकारने धरणाची उंची वाढविण्यासाठी परवानगी दिली आहे. मात्र, सध्या तरी कोणत्याही प्रकारची उंची वाढवण्याचे काम सुरू नाही. असे हिरगौडकर यांनी माहिती दिली.

दरम्यान, या धरणाची उंची वाढवण्यासाठी कर्नाटक सरकारला तेथील हजारो हेक्टर जमिनीचे भूसंपादन करावे लागणार आहे. त्याची तयारी सुरू केली असल्याने कोल्हापूर आणि सांगली जिल्ह्यात अलमट्टीचे संकट नव्याने उभारणार असल्याने आतापासूनच भीतीचे वातावरण आहे.

दरम्यान, या धरणाची उंची वाढवण्यासाठी कर्नाटकात नव्याने भूसंपादन करावे लागणार आहे. हे भूसंपादन २ वर्षांपासून सुरू आहे. मात्र, यासाठी १ लाख ३३ हजार एकर जमीन संपादित करावी लागणार आहे. हे काम सध्या तरी सोपे नाही. आतापर्यंत केवळ २८ हजार एकर जमीन संपादित करण्यात कर्नाटक सरकारला यश आले आहे. यात हजारो शेतकऱ्यांनी हे भूसंपादन थांबवावे म्हणून न्यायालयात धाव घेतली आहे.

८० टीएमसी पाणीसाठा वाढणार

अलमट्टी हे कर्नाटकमधील सर्वांत मोठे धरण आहे. सध्या ५१९ मीटरवरून ५२४ मीटरपर्यंत उंची वाढवण्याचा प्रस्ताव आहे. याला केंद्रीय जल आयोगाने मंजुरी दिली आहे. ही उंची वाढल्यास सध्याच्या पाणीसाठ्यापेक्षा ८० टीएमसी पाणी जास्त साठा होईल, असा अंदाज आहे.