Maharashtra Rain : परभणी, हिंगोलीतील सात मंडलांत कमी पाऊस

Parbhani News : जून महिन्यात परभणी जिल्ह्यात सरासरी १४५.३ मिमी पाऊस अपेक्षित आहे परंतु यावर्षी (२०२४ ) प्रत्यक्षात १७०.४ मिलिमीटर (११७.३टक्के) तर हिंगोली जिल्ह्यात सरासरी १६९.२ मिमी अपेक्षित असतांना प्रत्यक्षात सरासरी १४९.८ मिमी (८८.५ टक्के) पाऊस झाला. यंदाच्या जून मध्ये परभणी जिल्ह्यात सरासरीपेक्षा २५.१० मिमी जास्त तर हिंगोली जिल्ह्यात सरासरीपेक्षा १९.४ मिमी कमी पाऊस झाला. या दोन जिल्ह्यातील ८२ पैकी ३४ मंडलांमध्ये सरासरीपेक्षा कमी पाऊस झाला असून त्यात १०० मिमी पेक्षा कमी पाऊस झालेल्या ७ मंडलांचा समावेश आहे.

परभणी जिल्ह्यात जून महिन्यात २०२० ते २०२४ या ५ पैकी २ वर्षी सरासरीपेक्षा कमी तर ३ वर्षात सरासरीपेक्षा जास्त पाऊस झाला. यंदाच्या जूनमध्ये जिल्ह्यातील ५२ पैकी १४ मंडलात सरासरीपेक्षा कमी पाऊस झाला तर त्यात १०० मिमीपेक्षा पाऊस झालेली पिंगळी, वालूर, कावलगाव हि ३ मंडले आहेत.सर्वात कमी कावलगाव (ता. पूर्णा) मंडलामध्ये ६५ मिमी (६४.३ टक्के) तर सर्वाधिक ताडबोरगाव (ता. मानवत) मंडलामध्ये २५४.८ मिमी (१९६.८ टक्के) पाऊस झाला.

हिंगोली जिल्ह्यात सलग तिसऱ्या वर्षी जून मध्ये सरासरीपेक्षा कमी पाऊस झाला आहे. मागील ५ पैकी ३ वर्षी सरासरीपेक्षा कमी तर २ वर्षी जास्त पाऊस झाला. यंदाच्या जूनमध्ये जिल्ह्यातील ३० पैकी २० मंडलात सरासरीपेक्षा कमी पाऊस झाला आहे. त्यात १०० मिमी पेक्षा कमी पाऊस झालेली आखाडा बाळापूर, डोंगरकडा, गिरगाव, कुरुंदा हि ४ मंडले आहेत. सर्वात कमी पाऊस गिरगाव (ता. वसमत) मंडलामध्ये ८१.८ मिमी (५०.४ टक्के) तर सर्वाधिक सिरसम (ता. हिंगोली ) मंडलामध्ये २३१.७ मिमी (१३४.४ टक्के) पाऊस झाला आहे.

जून महिन्यातील तुलनात्मक पाऊस स्थिती (मिमीमध्ये)

परभणी जिल्हा :

वर्षे सरासरी प्रत्यक्ष पाऊस टक्केवारी

२०२० १४५.३ १९६.८ १३५.४

२०२१ १४५.३ २५०.५ १७२.४

२०२२ १४५.३ १३७.४ ९४.६

२०२३ १४५.३ ५५.५ ३८.२

२०२४ १४५.३ १७०.४ ११७.३

हिंगोली जिल्हा :

वर्षे सरासरी प्रत्यक्ष पाऊस टक्केवारी

२०२० १६९.२ २३५.४ १३९.१

२०२१ १६९.२ २५१.६ १४८.७

२०२२ १६९.२ १२१.७ ७१.९

२०२३ १६९.२ ४५.१ २६.७

२०२४ १६९.२ १४९.८ ८८.५