Panchaganga River Water : पंचगंगा नदी इशारा पातळीपासून ३ फूट दूर; आलमट्टी धरणाचा विसर्ग वाढवला

Kolhapur Rain Update : मागच्या दोन दिवसांपासून होत असलेल्या पावसाने कोल्हापूर जिल्ह्यातील नद्या पात्राबाहेर गेल्या आहेत, तर पंचगंगा नदीवरील राजाराम बंधाऱ्याची पाणी पातळी आज (ता.२०) सायंकाळी ५ वाजता ३६.३ फुटांवर होती. इशारा पातळी ३९ फुटांवर असल्याने जिल्ह्यात संततधार पाऊस राहिल्यास पुढच्या २४ तासांत इशारा पातळी गाठण्याची शक्यता आहे.

कालपासून पंचगंगा नदीच्या पाणीपातळीत २ फुटांनी वाढ झाली आहे तर जिल्ह्यातील ८० बंधारे पाण्याखाली गेले आहेत. पुराच्या पाण्याने २८ राज्य आणि जिल्हामार्ग बंद आहेत. हवामान विभागाने दिलेल्या माहितीनुसार उद्या कोल्हापूर जिल्ह्यात पावसाचा येलो अलर्ट देण्यात आला आहे.

काल आणि आज दोन दिवस धरण क्षेत्रात मुसळधार पाऊस पडत असल्याने राधानगरी धरण ८० टक्क्यांवर गेले आहे तर १ हजार ४० क्युसेक्सने पाण्याचा विसर्ग सुरू आहे. जिल्ह्यात सर्वच नद्यांचे पाणी पात्राबाहेर पडल्याने वाहतूकीचे मार्ग बंद झाले आहेत.

यामध्ये ५ राज्य मार्ग, ११ प्रमुख जिल्हा मार्ग तर १२ ग्रामीण मार्ग असे २८ मार्गावरील वाहतूक बंद झाली आहे. त्याचबरोबर गडहिंग्लज, गारगोटी व चंदगड तालुक्यातील एस. टी. चे तीन मार्ग बंद राहिले आहेत.

काल आणि आज घाटमाथ्यावर पावसाचा जोर कायम राहिल्याने नद्यांची पाणी पातळी झपाट्याने वाढली आहे. राधानगरीतून प्रतिसेंकद १४५०, घटप्रभा मधून ८४३४, वारणा धरणातून १३९६ तर कोदे मधून ८१८ घनफुट पाण्याचा विसर्ग सुरु आहे.

आलमट्टीतून विसर्ग वाढवला

कोल्हापूर आणि सांगली जिल्ह्याला कारणीभूत ठरलेल्या आलमट्टी धरणातून विसर्ग वाढवावा म्हणून कृष्णा बचाव कृती समितीकडून वारंवार कर्नाटक पाटबंधारे विभागाला दिल्या जात होता. परंतु आलमट्टी धरणातून फक्त ६५ हजार क्युसेक्सने पाण्याचा विसर्ग केला जात होता. आजपासून तो विसर्ग वाढवून १ लाख क्युसेक्तपर्यंत वाढवण्यात आला आहे. यामुळे कोल्हापूर जिल्ह्यातील शिरोळ तालुक्यातील नद्यांना आलेली फूग कमी होण्याची शक्यता आहे.