Kharif Sowing : सांगली जिल्ह्यात खरिपाची पेरणी दोन लाख ४० हजार हेक्टरवर

Sangli News : जिल्ह्यात यंदा पेरणीपूर्वी चांगला पाऊस झाल्याने खरीप हंगामातील पेरणी आटोपली आहे. खरीपाचा पेरा २ लाख ४० हजार १९० हेक्टरवर झाला असून सोयाबीन, उडीद, मूग, तूर पिकांसह अन्य पिकांची वाढ चांगली झाली आहे. गतवर्षीच्या तुलनेत यंदाच्या हंगामात ८७ हजार ०४२ हेक्टरने वाढ झाली आहे, अशी माहित कृषी विभागाच्या सूत्रांनी दिली.

जिल्ह्यात गतवर्षी उन्हाळी, पूर्व मोसमी आणि मॉन्सून पावसाने दडी मारली. उशिरा पाऊस सुरू झाला. याचा फटका खरीप हंगामातील पिकांच्या पेरणीवर झाला. गत वर्षी १ लाख ५३ हजार १४८ हेक्टर म्हणजे ५९ टक्क्यांवर पेरा झाला होता. अपुऱ्या पावसामुळे खरीप हंगामातील पिकेही वाया गेली होती. त्यामुळे शेतकऱ्याच्या हाती काहीच उत्पादन आले नाही.

यावर्षी हवामान खात्याने वेळेवर पाऊस सुरू होईल, असा अंदाज व्यक्त केला होता. त्यानुसार जून महिन्याच्या मध्यापासून पावसाला सुरुवात झाली. त्यामुळे शेतकऱ्यांनी खरिपाचा पेरा वेळेत सुरू केला. जुलै महिन्याच्या मध्यापर्यंत पावसाने उघडीप दिली. या दरम्यान, सोयाबीन, भूईमुग, या पिकांसह अन्य पिकांची पेरणी शेतकऱ्यांनी उरकून घेतली.

त्यानंतर जुलैच्या मध्यानंतर पावसाला सुरुवात झाली. यामुळे पिकांना हा पाऊस उपयुक्त ठरला. यंदाच्या खरीप हंगामाचे सरासरी क्षेत्र २ लाख ५५ हजार ९८४ हेक्टर असून २ लाख ४० हजार १९० हेक्टरवर पेरा झाला आहे. गतवर्षीच्या तुलनेत यंदा सरासरी पेक्षा अधिक पाऊस झाल्याने क्षेत्रात ८७ हजार ०४५ हेक्टरने वाढ झाली आहे.

ज्वारी, तूर, मुग, सोयाबीन ही पिके वाढीच्या अवस्थेत असून आगाप पेरणी केलेली पिके फुरोलावस्थेत आहेत. तर मका पिकावर अमेरिकन लष्करी अळीचा प्रादुर्भाव दिसून येत आहे. सोयाबीन, मका, मूग या पिकांवर किडीचा प्रादुर्भाव झाला असून शेतकऱ्यांना याबाबत जनजागृती केली आहे.

तालुकानिहाय अंतिम पेरणीस्थिती (क्षेत्र हेक्टरमध्ये)

तालुका क्षेत्र

मिरज २३ हजार ०१६

जत ७५ हजार १४६

खानापूर १६ हजार ३२८

वाळवा २० हजार ९६०

तासगाव ३१ हजार ९९९

शिराळा १९ हजार ३१३

आटपाडी १४ हजार ४११

कवठेमहांकाळ २१ हजार ७३०

पलूस ५ हजार ८४१

कडेगाव ११ हजार ४४५

एकूण २ लाख ४० हजार १९०