Kharif Season 2025 : यवतमाळला खरिपात पाच लाख हेक्टरवर कपाशीचा पेरा तर अडीच लाख हेक्टरवर सोयाबीनचा पेरा होण्याचा अंदाज

Yavatmal News : यवतमाळ : यंदाच्या खरीप हंगामाची तयारी कृषी विभागाने सुरू केली आहे. चार लाख ९१ हजार हेक्टरवर कपाशी, तर दोन लाख ६५ हजार हेक्टरवर सोयाबीनची लागवड होण्याची शक्यता वर्तविण्यात आली आहे.

पांढऱ्या सोन्याचा जिल्हा म्हणून यवतमाळ जिल्ह्याची ओळख आहे. जिल्ह्यात दर वर्षी सर्वाधिक पेरा कापसाचा होतो. गेल्या हंगामात अनियमित पावसामुळे शेतकऱ्यांसमोर मोठे संकट उभे राहिले होते. अशा परिस्थितीत शेतकऱ्यांनी हिंमत न हारता उत्पन्न घेतले. मात्र, भाव नसल्याने शेतकऱ्यांची मोठी अडचण झाली. जुन्या घटना लक्षात न ठेवता शेतकरी नव्या दमाने नव्या हंगामाच्या कामाला लागले आहेत.

खरीप हंगामासाठी शेतकऱ्यांनी मशागत सुरू केली आहे. कृषी विभागही खरीप हंगामाच्या अनुषंगाने तयारीला लागला आहे. खरीप हंगामातील पेरा, बियाणे, खतांचे नियोजन केले आहे. गेल्या वर्षी नऊ लाख हेक्टरवर खरिपाची पेरणी झाली होती. सर्वाधिक चार लाख ७२ हजार हेक्टरवर कापसाची लागवड झाली होती. येणाऱ्या खरीप हंगामात चार लाख ९१ हजार हेक्टरवर कपाशीचा पेरा होण्याचा अंदाज कृषी विभागाने वर्तविला आहे.

त्या दृष्टीने नियोजनाला सुरवात करण्यात आली आहे. यासाठी आवश्यक असलेले कपाशी बियाण्याचे पाकीट, खतांचे नियोजनही कृषी विभागाने केले आहे. कपाशीचे बियाणे कोणत्या कंपनीकडून किती येणार, यांची संभाव्य तयारी करून ठेवण्यात आली आहे. त्यामुळे शेतकऱ्यांना बियाण्याचा तुटवडा भासणार नसल्याचा दावा कृषी विभागाने केला आहे.

कपाशीसोबत दोन लाख ६५ हजार हेक्टरवर सोयाबीनची लागवड होण्याचा अंदाज आहे. गेल्या वर्षीच्या तुलनेत सोयाबीनचे क्षेत्र घटण्याचा अंदाज आहे. त्यानुसार बियाण्यांची नोंदणी कृषी विभागाने केली आहे. महाबीज सोबत खासगी कंपनीकडून पुरवठा करण्यात येणारे बियाणे मुबलक प्रमाणात उपलब्ध होण्याच्यादृष्टीने तयारी सुरू केली आहे. गेल्या वर्षी कापसाला मोठ्या प्रमाणात फटका बसला. कापूस शेतकऱ्यांचे हुकमी पीक असल्याने यंदाही शेतकऱ्यांनी कपाशीला पसंती दिल्याचे दिसून येत आहे.

२०२५ चे खरीप संभाव्य नियोजन
पीक क्षेत्र (हेक्टरमध्ये)
ज्वारी २,९३८
बाजरी ८३
तूर १,०८,३५३
मुंग १,९५७
उडीद १,८७५
तीळ २२७
मका ४०७
कापूस ४,९१,१९८