Village Cleaning Campaign : उद्यापासून ‘आपलं गाव स्वच्छ ठेवा’अभियान सुरू

नाशिक : ग्रामीण भागात शाश्वत स्वच्छता राखली जावी आणि ‘स्वच्छता ही सेवा’ या संकल्पना प्रत्यक्षात उतरवण्यासाठी शासनाच्या वतीने १ मे २०२५ पासून ‘कंपोस्ट खड्डा भरा, आपलं गाव स्वच्छ ठेवा’ हे राज्यव्यापी विशेष स्वच्छता अभियान राबविण्यात येणार आहे. या अभियानाद्वारे गावात निर्माण होणाऱ्या ओल्या कचऱ्याचे व्यवस्थापन करून त्यापासून कंपोस्ट खत तयार करण्याबाबत काम करण्यात येणार असल्याची माहिती जिल्हा परिषदेच्या मुख्य कार्यकारी अधिकारी आशिमा मित्तल यांनी दिली.

स्वच्छ भारत अभियान (ग्रामीण) अंतर्गत ग्रामीण भागात प्रत्येक गावात सांडपाणी व घनकचरा व्यवस्थापनाची काम करण्यात येत आहेत. अनेक गावांमध्ये ही कामे पूर्ण असून ओल्या कचऱ्यासाठी ‘नाडेप’ खत खड्डे उभारण्यात आले आहेत. या खत खड्याचा वापर करून खतनिर्मिती करावी यासाठी हे अभियान राबविण्यात येणार आहे. ओला कचरा गोळा करून तो योग्य प्रकारे वर्गीकृत करणे आणि त्यातून जैविक खत तयार करणे हा या अभियानाचा मुख्य उद्देश आहे.या खताचा उपयोग ग्रामपंचायतीमधील वृक्षासाठी तसेच भविष्यात शेतकऱ्यांना करण्यात येणार आहे.

अभियानाचा प्रारंभ १ मे रोजी स्थानिक लोकप्रतिनिधी व ग्रामस्थ यांच्या उपस्थितीत करण्याचे निर्देश देण्यात आल्याची माहिती पाणी व स्वच्छता विभागाचे उप मुख्य कार्यकारी अधिकारी दीपक पाटील यांनी दिली.  

सर्व गावांनी सहभागी व्हावे : आशिमा मित्तल
या उपक्रमाच्या माध्यमातून केवळ स्वच्छता नव्हे तर पर्यावरणपूरक खतनिर्मिती,शेतीस मदत व ग्रामस्वच्छतेबाबत जनजागृती हे उद्दिष्ट गाठले जाणार आहे..जिल्ह्यातील प्रत्येक गावाने या मोहिमेत सहभागी व्हावे. घराघरांत ओला व सुका कचरा वेगळा करावा.

ओल्यापासून कंपोस्ट किंवा गांडूळ खत तयार करावे व सुक्या कचऱ्याचे पुनर्प्रक्रियेसाठी वर्गीकरण करावे. गाव स्वच्छ व सुंदर ठेवण्यासाठी प्रत्येकाचा सहभाग गरजेचा असून लोकसहभागातून हे अभियान यशस्वी करावे, असे आवाहन मित्तल यांनी केले आहे.