Jalgaon APMC : जळगाव बाजार समितीला अतिक्रमणांचा वेढा कायम

Jalgaon News : जळगाव बाजार समितीत धान्य व फळ भाजी मार्केट यार्डात अतिक्रमणांची समस्या वाढली आहे. यातच शेतकऱ्यांसाठी शेतकरी निवास व अन्य सुविधांचा अभावही आहे. बाजार समितीने धान्य मार्केट यार्डातील मुख्य द्वारानजीकच्या आपल्या एका इमारतीत बँकेला भाडेतत्त्वावर जागा दिली आहे. या बँकेच्या वरच्या भागात शेतकरी निवास आहे. पण त्याची दैना झाली आहे.

त्यात पाणी, शौचालय व विश्राम गृहात कुठल्याही सुविधा नाहीत. त्यातील खिडक्यांच्या काचा फुटल्या आहेत. तसेच धूळ आहे. त्याची कुठलीही साफसफाई केली जात नाही, अशी स्थिती आहे. फळ व भाजीपाला मार्केट यार्डातही शेतकरी निवास किंवा विश्रामगृहाची व्यवस्था हवी आहे. खानदेशातील सर्वात मोठी बाजार समिती म्हणून जळगाव बाजार समितीची ओळख आहे. भाजीपाला मार्केट यार्डात रात्री - मध्यरात्री विविध भागातील शेतकरी आपला भाजीपाला, शेतमाल घेऊन लिलावासंबंधी पोचतात.

कारण लिलाव सकाळी सहा वाजेपासून सुरू होतात. छत्रपती संभाजीनगरातील सिल्लोड, सोयगाव, धुळ्यातील साक्री, धुळे आदी भागातूनही शेतकरी येतात. त्यांच्यासाठी शुद्ध पिण्याचे पाणी, विश्रामगृह आदी सुविधा बाजार समितीने उपलब्ध करून देणे आवश्यक आहे. परंतु याकडे प्रशासनाचे दुर्लक्ष आहे.

शेतकऱ्यांनाही सुविधा द्या...

बाजार समितीत फळ व भाजीपाला मार्केटमधील अडतदारांसाठी स्वतंत्र कार्यालय आहे. धान्य मार्केटमध्येही स्वतंत्र कार्यालय अडत असोसिएशनसाठी आहे. तेथे शौचालय व अन्य सुविधाही आहेत. परंतु शेतकऱ्यांसाठी मात्र शौचालयदेखील बाजार समितीत नाही. शेकडो शेतकरी रोज बाजार समितीत येतात, पण त्यांच्यासाठी शुद्ध पाण्याची प्रशस्त सुविधा बाजार समिती प्रशासनाने केलेली नाही, अशी नाराजी शेतकरी व्यक्त करीत आहेत.

बाजार समितीत अतिक्रमणांची समस्या जैसे थे आहे. चहा-पान टपऱ्यांची संख्या वाढलीच आहे. तसेच मुख्य प्रवेशद्वारानजीक नेहमी रिक्षाचालक व अन्य वाहनधारकांची गर्दी असते. फळ व भाजीपाला मार्केट यार्डात रोजच मुख्य प्रवेशद्वारानजीक शेतकरी व रिक्षाचालक यांच्यात वाट काढण्यावरून वाद होतात. याशिवाय गटारी व अन्य सुविधादेखील बाजार समितीत नसल्याने दुर्गंधीचे साम्राज्य असते, अशा तक्रारी शेतकरी करीत आहेत.