MPKV Rahuri : महात्मा फुले कृषी विद्यापीठातर्फे पुणे येथे आंतरराष्ट्रीय संमेलन

Nagar News : महात्मा फुले कृषी विद्यापीठातील जागतिक बँक अर्थसाह्यित राष्ट्रीय कृषी उच्च शिक्षण प्रकल्पांतर्गत हवामान अद्ययावत शेती व जल व्यवस्थापनाचे आधुनिक कृषी विज्ञान आणि तंत्रज्ञान प्रकल्पांतर्गत पुणे येथे येत्या २० व २१ रोजी ‘भविष्यातील शेती’ या विषयावर आंतरराष्ट्रीय संमेलनाचे आयोजन करण्यात आलेले आहे, अशी माहिती महात्मा फुले कृषी विद्यापीठाचे कुलगुरू डॉ. पी. जी. पाटील यांनी दिली.

महात्मा फुले कृषी विद्यापीठातर्फे होणाऱ्या आंतरराष्ट्रीय संमेलनात एक आंतरराष्ट्रीय परिषद व पाच आंतरराष्ट्रीय परिसंवादात आंतरराष्ट्रीय संमेलनात आधुनिक कृषी तंत्रज्ञान या विषयावर आंतरराष्ट्रीय परिषद आणि कृषीमध्ये ड्रोनचा वापर, कृषीमध्ये कृत्रिम बुद्धिमत्ता व हायपरस्पेक्ट्रल इमेजेस, इंडोर फार्मिंग, कृषीमध्ये यंत्रमानवाचा उपयोग, कृषीमध्ये आय.ओ.टी.चा वापर या पाच विषयांवर परिसंवाद होणार आहेत.

या संमेलनाचा उद्देश म्हणजे विद्यार्थी, शास्त्रज्ञ, शेतकरी, नवउद्योजक यांना आधुनिक तंत्रज्ञानाची ओळख करून देणे, जगात सुरू असलेले तंत्रज्ञानातील बदल अवगत करून देणे, नवीन तंत्रज्ञानाचा कार्यक्षम वापर, शेतीत होत असलेल्या वेगवान तंत्रज्ञान बदलामधील धोरणे, पर्यावरण पूरक तंत्रज्ञानाची ओळख करून देण्यात येईल.

या परिसंवादांमध्ये संबंधित विषयानुसार तज्ज्ञ आपले संशोधन सादर करणार आहेत. आंतरराष्ट्रीय संमेलनात विद्यार्थी, शास्त्रज्ञ, प्राध्यापक, उद्योजक, नवउद्योजक सहभागी होऊन आपले संशोधनपर लेख सादर करू शकतील. उत्कृष्ट सादरीकरणास प्रमाणपत्र देऊन सन्मानित करण्यात येणार आहे.

या संमेलनात जास्तीत जास्त विद्यार्थी, शास्त्रज्ञ, प्राध्यापक, उद्योजक यांनी सहभाग घ्यावा असे आवाहन संमेलनाचे निमंत्रक व प्रमुख संशोधक, कास्ट तथा संशोधन संचालक डॉ. सुनील गोरंटीवार आणि सहनिमंत्रक तथा सहसंशोधक कास्ट डॉ. मुकुंद शिंदे यांनी केले. या आंतरराष्ट्रीय संमेलनाची अधिक माहिती कास्ट व आय.सी.एफ.एफ. या संकेतस्थळावर टाकण्यात आली आहे.