Kaju Pest Infestation : काजू पिकावर फूलकिडींचा प्रादुर्भाव

Sindhudurg News : सिंधुदुर्ग जिल्ह्यात गेल्या सात-आठ दिवसांपासून सुरू असलेला पाऊस आणि ढगाळ वातावरणामुळे काजू पिकावर फूलकिडींचा प्रादुर्भाव वाढला आहे. त्यामुळे काजू बागायतदारांची धास्ती वाढली आहे.

जिल्ह्यात ३ डिसेंबरपासून विजांच्या कडकडाटासह पावसाच्या सरी पडत आहेत. ७ डिसेंबरला जिल्ह्याच्या अनेक भागांत पावसाच्या जोरदार सरी झाल्या. याशिवाय १ ते ८ डिसेंबर या कालावधीत सतत ढगाळ वातावरण राहिले. या वातावरणाचा परिणाम आता काजू पिकावर दिसून येऊ लागला आहे.

जिल्ह्यातील ७० ते ८० टक्के काजू पिकाला पालवी आणि मोहर आलेला आहे. या पिकावर आता फूलकिडींचा प्रादुर्भाव वाढल्याचे चित्र आहे. त्यामुळे शेतकऱ्यांमध्ये चिंतेचे वातावरण निर्माण झाले आहे. शेतकऱ्यांनी यापूर्वीच एक फवारणी पूर्ण केली आहे.

परंतु आता कीड-रोग वाढत असल्याने पुन्हा आणखी एक फवारणी करावी लागणार आहे. त्यातच पावसाची शक्यता असल्यामुळे रविवारपर्यंत (ता. ८) शेतकऱ्यांनी फवारणी टाळली. अनेक झाडांना कोवळी पालवी असल्यामुळे टी-मॉस्किटोचा प्रादुर्भाव होण्याची शक्यता आहे.