Cotton Bollworm : ‘कीटकनाशक प्रतिकारक्षमता व्यवस्थापन’ प्रकल्प कार्यान्वित

Chhatrapati Sambhajinagar News : मराठवाड्यासह इतर कापूस उत्पादक जिल्ह्यांत गुलाबी बोंड अळी नियंत्रणासाठी ‘कीटकनाशक प्रतिकारक्षमता व्यवस्थापन रणनीतीचा प्रसार प्रकल्प’ कार्यान्वित करण्यात आला आहे.

कापूस पिकात सद्यःस्थितीत गुलाबी बोंड अळीचा प्रादुर्भाव आढळून येत आहे. या अळीने बहुतेक कीटनाशकांना तोंड देत बोंडाच्या आतमध्ये आपला क्लिष्ट जीवनक्रम पीकहानी स्तरापर्यंत पोहोचवला आहे.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

या अनुषंगाने भारतीय कृषी संशोधन परिषद, नवी दिल्ली (आयसीएआर) आणि केंद्रीय कापूस संशोधन केंद्र नागपूरमार्फत ‘कीटकनाशक प्रतिकारक्षमता व्यवस्थापन रणनीतीचा प्रसार प्रकल्प देशभरातील उत्पादकांच्या प्रक्षेत्रावर सुरू करण्यात आला आहे.

मराठवाड्यातील छत्रपती संभाजीनगर, नांदेड, परभणी, जालना या जिल्ह्यांतील प्रत्येकी पाच गावांत हा प्रकल्प राबविला जात आहे. जालना जिल्ह्यात मार्गदर्शक तत्त्वावर कृषी संशोधन केंद्र बदनापूरचा समावेश आहे. या केंद्राचे हा प्रकल्प राबविण्याचे हे सहावे वर्ष आहे. इतर जिल्ह्यात यंदा पहिल्यांदाच हा प्रकल्प राबविला जात आहे.

जालना जिल्ह्यातील कोदोली (ता. भोकरदन), दरेगाव (ता. जालना) तर वाहेगाव, धोपटेश्वर, गेवराई (ता. बदनापूर) येथे हा प्रकल्प राबविला जात आहे. याअंतर्गत शेतकऱ्यांना जैविक पद्धतीने गुलाबी बोंड अळीचे एकात्मिक कीड व्यवस्थापन मार्गदर्शन, निविष्ठा वितरण करण्यात आले. या वेळी कृषी संशोधन केंद्राचे प्रभारी अधिकारी डॉ. के. टी. जाधव, प्रकल्प समन्वयक डॉ. डी. एस. मुटकुळे, वरिष्ठ संशोधन सहकारी राजेश उदावंत, सुनील मगरे, लाभार्थी शेतकरी उपस्थित होते.