Cotton Seeds Seized Nashik : नाशिक जिल्ह्यात अवैध एचटीबीटी कापूस बियाणे जप्त

Nashik Cotton Seeeds : नाशिक विभागात जळगाव, धुळे, नंदुरबार व नाशिक जिल्ह्यात बंदी असूनही अवैधरित्या ‘एचटीबीटी’ कापूस बियाण्यांची लागवडीसाठी विक्री केली जाते. या पार्श्‍वभूमीवर गुण नियंत्रण विभागाने सावध होत जळगाव, धुळे व नंदुरबार या तीन जिल्ह्यांत आतापर्यंत ४ ठिकाणी कारवाई केली आहे. यात ३४ लाख किमतीची २,२९३ बियाणे पाकिटे जप्त करण्यात आल्याची माहिती नाशिक विभागाचे गुणवत्ता नियंत्रण तंत्र अधिकारी उल्हास ठाकूर यांनी दिली.

फसवणूक व नुकसान टाळण्यासाठी अवैध एचटीबीटी बियाणे खरेदी टाळावी यासाठी कृषी विभागाने जनजागृती करत आवाहन केले होते. या पार्श्‍वभूमीवर या बियाणे विक्री–पुरवठ्यावर गुणनियंत्रण विभागाची नजर होती. मंगळवारी (ता. २०) नंदुरबार व शिरपूर येथे नाशिक विभागस्तरीय पथकाने वेगवेगळ्या ठिकाणी एकाच वेळेस सापळा रचून डमी ग्राहक पाठवून अनधिकृत एचटीबिटी कापूस बियाणे विक्री करणाऱ्या व्यक्तींवर २ गुन्हे दाखल केले आहेत. नंदुरबार आणि शिरपूर शहरात एकाच दिवशी कारवाई झाली.

सापळा रचून नंदुरबार व शिरपूर शहरात या दोन वेगवेगळ्या ठिकाणी एकाच वेळी साधारणपणे ११ ते १२ च्या दरम्यान सापळा रचून बेकायदा व अनधिकृत एचटीबीटी कापूस बियाणे विक्री करणाऱ्या व्यक्तींविरोधात २ वेगवेगळे गुन्हे दाखल केले आहेत.

एकाच दिवशी दोन जिल्ह्यांत झालेल्या या कारवाईमुळे एचटीबीटी कापूस या अवैध बियाणे विकणाऱ्यांचे धाबे दणाणले आहेत. या वेळी नंदुरबार येथे अनिल ओंकार शिंदे (वय ३८) यांच्याकडून १.५० लाख किमतीची ९१ पाकिटे तर शिरपूर येथे सूर्यकांत गुजर (भरवाडे, ता. शिरपूर) यांना ताब्यात घेण्यात आले.