HTBT Seeds: अप्रमाणित बियाण्यांची मेमध्येच ‘अ‍ॅडव्हान्स बुकिंग’

Yavatmal News: जिल्ह्यात अप्रमाणित एचटीबीटीची मागणी वाढली आहे. मान्यता नसतानाही जिल्हात एचटीबीटीची आवक चक्रावून सोडणारी आहे. जून महिन्यात कृषी विभागाला जाग येते. प्रत्यक्षात अप्रमाणित बियाण्यांची बुकिंग (पूर्ण किमतीसह) मे महिन्यातच केली जाते. २० मेपर्यंत बुकिंग करणाऱ्या बियाणे पोहोचविले जात असल्याचे समोर आले आहे.

शेतकऱ्यांना दिल्या जाणाऱ्या एचटीबीटीची बुकिंग मे महिन्याच्या सुरुवातीलाच करण्यात आली. यासाठी संबंधित यंत्रणेकडून थेट शेतकऱ्यांपर्यंत बुकिंग करणारा एजंट पाठवला जातो. ओळखीतून आणि इतर प्रमाणित बियाण्यांच्या कंपनीत काम करणाऱ्या काही युवकांचा यासाठी वापर केला जातो. त्यांना वेगवेगळी आमिष दिले जाते.

याच वेळी शेतकऱ्यांच्या मागणीनुसार बुकिंग घेतली जाते. यासाठी पैसे आधीच घेतल्या जाते. साधारणतः १० ते १५ मे दरम्यान बुकिंगची प्रक्रिया पूर्ण केली जाते. यानंतर १५ मे ते ५ जून या काळात बियाण्यांचा पुरवठा केला जातो. यासाठी आधी मार्ग निश्‍चित केले जातात जातात.

एकाच मार्गावरील स्थळाची पडताळणी करून वेगवेगळ्या वाहनांचा वापर करीत थेट शेतकऱ्यांना गावापर्यंत बियाणे पोहोचविल्या जाते. विशेष म्हणजे, हा सर्व प्रकार रात्रीतून पूर्ण केला जातो. कुरिअर सर्व्हीसप्रमाणे एजंट बुकिंग करणाऱ्यांना फोन करून ठिकाण आणि वेळ दिली जाते.

यंदा एचटीबीटी, राऊंडअप, चोर बीटी अशा वेगवेगळ्या नावांनी ओळखल्या जाणाऱ्या एचटीबीटी बियाण्यांसाठी १२५० ते १५०० रुपये एका पाकीटची किंमत घेतल्या गेली. बियाणे न उठविल्यास कोणतीही हमी विकणारा घेत नाही. यामुळे बियाणे न उगविल्याची भीतीही मोठ्या प्रमाणात असून शेतकऱ्यांची लूट सुरू आहे.

दुचाकी ते ऑटोचा वापर

जिल्हात एचटीबीटीची खुलेआम विक्री सुरू आहे. बियाण्यांचा पुरवठा करण्यासाठी मोठ्या वाहनाऐवजी दुचाकीपासून तर ऑटो अशी वेगवेगळी वाहने वापरली जातात. यातही प्रवासी वाहनांची संख्या मोठी आहे. यामुळे कुणालाही संशय येणार नाही. अशा पद्धतीनेच एजंटचा वावर असतो. एचटीबीटीला मजूर कमी लागत असल्याने शेतकरीही याबाबत बोलायला तयार नसल्याचे पाहणीतून पुढे आले.