Kartiki Yatra : कार्तिकी यात्रेमुळे अवघ्या पंढरीत भक्तीला उधाण

Solapur News :

कार्तिकीचा सोहळा । चला जाऊं पाहूं डोळां ।

आले वैकुंठ जवळां । सन्निध पंढरीये ॥

अशी भावना व्यक्त करत पंढरपुरात गुरुवारी (ता. २३) कार्तिकी यात्रेसाठी राज्याच्या कानाकोपऱ्यातून दाखल झालेल्या वारकऱ्यांनी श्री विठ्ठल-रुक्मिणी चरणी आपली कृतार्थतेची भावना रुजू केली. या सोहळ्यासाठी सुमारे पाच लाखांहून अधिक वारकरी पंढरीत दाखल झाले आहेत. टाळ-मृदंगाचा गजर आणि ज्ञानोबा-तुकारामाच्या जयघोषाने अवघ्या पंढरीत भक्तीला उधाण आले.

वर्षातील चार प्रमुख वाऱ्यांपैकी एक असणाऱ्या कार्तिकी वारीचे अनन्य साधारण महत्त्व आहे. या वारीच्या सोहळ्यात सहभागासाठी गेल्या चार-पाच दिवसांपासून राज्याच्या कानाकोपऱ्यांतून विविध संतांच्या पालख्या-दिंड्या पंढरीत दाखल होत होत्या. त्यामुळे चंद्रभागा नदी आणि मंदिर परिसर वारकऱ्यांच्या गर्दीने फुलून गेला.

वारीचा मुख्य दिवस गुरुवारी (ता. २३) असला, तरी गेल्या दोन दिवसांपासून विशेषतः बुधवारपासूनच दशमीच्या चंद्रभागा नदीतील स्नानासाठी आणि दर्शनासाठी वारकऱ्यांची मोठी झुंबड पाहायला मिळाली.

पण यंदा चंद्रभागा नदीत उशिरा पाणी सोडल्याने आणि जेमतेम पाणीच पोहोचल्याने वारकऱ्यांना चंद्रभागेतील स्नानासाठी अक्षरशः अस्वच्छ पाण्यातच स्नान करावे लागल्याच्या भावना व्यक्त होत होत्या.

गुरुवारी पदस्पर्श दर्शनाची रांग पुन्हा गोपाळपूर रस्त्यांपर्यंत पोहोचली. गेल्या दोन दिवसांत पंढरपुरातील विविध मठ, मंदिरे आणि धर्मशाळांमध्ये भजन-कीर्तन आणि प्रवचने रंगली आहेत. सगळीकडे टाळ-मृदंगाचा गजर आणि हरिनामाचा जयघोष अखंडपणे सुरू आहे.

त्यामुळे पंढरपुरातील वातावरण भक्तीने पुरते भारून गेले आहे. पहाटेपासून गर्दीत मोठी वाढ झाली, अनेक वारकरी मुखदर्शन घेत होते, तर काही जण नगरप्रदक्षिणा मार्गावरून फेरी मारून परतत होते. दर्शनरांगेतील वारकऱ्यांना पदस्पर्शदर्शनासाठी १३ ते १५ तास लागत आहेत.