Crop Insurance : कृषी विभाग फेरसर्वेक्षण कशाचे करणार?

Yavatmal News : जिल्ह्यातील अतिवृष्टीबाधित शेतकऱ्यांना पीकविम्याची अत्यंत तोकडी रक्कम देण्यात आली. त्यामुळे शेतकऱ्यांमध्ये शासनाविरोधात नाराजी आहे. आगामी निवडणुका पाहता शासनाने फेरसर्वेक्षणाचे आदेश दिले आहेत. आता कृषी विभाग कशाचे सर्वेक्षण करणार, असा प्रश्‍न शेतकऱ्यांनी उपस्थित केला आहे. हा केवळ देखावा असल्याचा आरोप विरोधकांचा आहे.

जिल्ह्यातील ५९ हजार ४०४ शेतकऱ्यांना पीकविमा नुकसानभरपाईचे ४१ कोटी रुपये प्राप्त झाले. त्यापैकी काही शेतकऱ्यांना अत्यल्प नुकसानभरपाईची रक्कम प्राप्त झाली. नऊ हजार ७२७ शेतकऱ्यांना एक हजार रुपयांपेक्षा कमी नुकसानभरपाई मिळाली.

जिल्ह्यात ७८ शेतकऱ्यांना तर दहा रुपयांपेक्षा कमी भरपाई पीकविमा कंपन्यांनी दिली. त्यामुळे पीकविमा कंपन्यांविरोधात शेतकऱ्यांमध्ये प्रचंड रोष आहे. या विषयावर शिवसेना(उद्धव बाळासाहेब ठाकरे) गटाने आक्रमक आंदोलन केले होते.

पीकविमा कंपनीच्या व्यवस्थापकास काळे फासत मारहाण केली. शेतकऱ्यांमध्ये वाढत असलेला रोष कमी करण्यासाठी जिल्ह्यात नुकसानीचे फेरसर्वेक्षणाचे आदेश दिले. पालकमंत्री संजय राठोड यांनी मुख्यमंत्री एकनाथ शिंदे यांच्याकडे तक्रार देऊन कार्यवाही व्हावी व ही अन्यायकारक पीकविमा मदत पुन्हा सत्यपरिस्थितीचा अभ्यास करून वाढीव स्वरूपात विमा कंपन्यांनी द्यावी, अशी मागणी केली आहे.

सर्वेक्षण झाल्यावरदेखील पीक पिवळे पडल्याने सरासरी उत्पन्न शेतकऱ्यांना मिळाले नाही. नुकसानभरपाई प्राप्त शेतकऱ्यांच्या भरपाईविषयक तक्रारी प्राप्त करण्यासाठी तालुका कृषी अधिकारी कार्यालयात विशेष व्यवस्था करण्यात आली आहे. मात्र, कृषी विभागाला काय द्यायचे, असा प्रश्‍न शेतकऱ्यांना पडला आहे.

नुकसान झाले तेव्हा विमा कंपनीने सर्वेक्षण केले. त्यामुळे त्यांनी वस्तुस्थितीनुसार शेतकऱ्यांना मदत देण्याची मागणी शिवसेनेने (उद्धव बाळासाहेब ठाकरे) केली आहे. दुसरीकडे पीकविमा कंपनीने दिलेला मोबदला योग्य नसल्याच्या तक्रारी शेतकरी करीत आहेत.