Prime Minister's National Award : सोलापूर जिल्ह्यांच्या उत्कृष्ट कामांचा ‘प्रधानमंत्री राष्ट्रीय पुरस्कार’ने सन्मान

Solapur News : सोलापूर जिल्ह्यातील ‘ऑपरेशन परिवर्तन’या नावीन्यपूर्ण उपक्रमांचा प्रधानमंत्री नरेंद्र मोदी (Prime Minister Narendra Modi) यांच्या हस्ते ‘नागरी सेवा दिनी’ ‘प्रधानमंत्री राष्ट्रीय पुरस्कारा’ने नुकताच गौरव करण्यात आला. सोलापूर जिल्ह्याचे पोलिस अधीक्षक शिरीष सरदेशपांडे यांनी हा पुरस्कार स्वीकारला.

दरवर्षी २१ एप्रिल हा दिवस ‘नागरी सेवा दिन’ म्हणून साजरा केला जातो. यंदाचे हे १६ वे वर्ष आहे. दिल्लीतील विज्ञान भवनात प्रधानमंत्री नरेंद्र मोदी यांच्या प्रमुख उपस्थितीत केंद्रीय प्रशासकीय सुधारणा, सार्वजनिक तक्रारी आणि पेन्शन (DOPT) मंत्रालयांच्यावतीने या कार्यक्रमाचे आयोजन करण्यात आले.

या वेळी केंद्रीय प्रशासकीय सुधारणा, सार्वजनिक तक्रारी आणि पेन्शन मंत्री डॉ. जितेंद्र सिंग, प्रधानमंत्री सच‍िवालयाचे सचिव डॉ. पी. के. मिश्रा, कॅबिनेट सचिव राजीव गुबा आणि केंद्रीय प्रशासकीय सुधारणा आणि सार्वजनिक तक्रारी विभागाचे सचिव वी. श्रीनिवास हे व्यासपीठावर उपस्थित होते.

...असे आहे ऑपरेशन परिवर्तन

सोलापूर ग्रामीण पोलिस दलाने जिल्ह्यामध्ये अवैध दारू व्यवसायावर आळा घालण्याकरिता व त्याचे समूळ उच्चाटनासाठी ‘ऑपरेशन पर‍िवर्तन’ वर्ष २०२१-२२ मध्ये नावीन्यपूर्ण पद्धतीचा उपक्रम सुरू केला.

या उपक्रमाअंतर्गत जिल्ह्यातील हातभट्टी दारू निर्मिती व विक्रीची ११७ ठिकाणे निश्चित करून त्यातील गावे पोलिस निरिक्षक, सहायक पोलिस निरीक्षक, पोलिस उपनिरीक्षक अधिका-यांना दत्तक देण्यात आली.

सातत्यपूर्ण कारवाई, समुपदेशन, पुनर्वसन, जागृती या चार टप्यावर हा कार्यक्रम राबविण्यात आला. ज्याचा परिणाम म्हणून ७२६ व्यक्तींनी स्वत: चा पारंपारिक दारूचा व्यवसाय सोडून अन्य व्यवसाय स्वीकारले.

तत्कालीन पोलिस अधीक्षक तेजस्वी सातपुते यांनी त्यासाठी पुढाकार घेतला होता. या उपक्रमासाठी हा पुरस्कार मिळाला आहे.