Loan Recovery : हिवरे बाजार सेवा सोसायटीची यंदाही शंभर टक्के कर्जवसुली

Hiware Bazar Village : अहिल्यानगर ः कर्जाची वसुली होत नसल्याने अनेक विविध कार्यकारी सेवा सहकारी सोसायट्या अडचणीत आहेत. मात्र अहिल्यानगर तालुक्यातील आदर्श गाव हिवरेबाजार येथे यंदाही सोसायटीची कर्जवसुली शंभर टक्के झाली आहे. शेतकऱ्यांनी घेतलेल्या कर्जापोटी सुमारे सव्वातीन कोटी रुपयांचा शंभर टक्के भरणा केला आहेत. सलग सोळा वर्षांपासून विविध कार्यकारी सेवा सहकारी सोसायटीच्या शंभर टक्के कर्जवसुलीची पंरपरा जोपासणारे हिवरेबाजार हे राज्यातील एकमेव गाव आहे.

लोकसहभाग आणि लोकवर्गणीच्या मदतीने विकास साधत आदर्शगाव हिवरेबाजारने (ता. अहिल्यानगर) देशात आपली ओळख निर्माण केली आहे. सततच्या कमी पावसामुळे दुष्काळी पट्टा अशी ओळख असूनही सप्तपदी उपक्रम, पाण्याचा ताळेबंद, व जलसंधारणाच्या कामातून एकोपा दाखवत हिवरेबाजार आदर्श झालेले आहे. येथे पद्मश्री पोपटराव पवार यांच्या मार्गदर्शनाखाली दरवर्षी सातत्याने वेगवेगळे प्रयोग सुरू असतात.

गावांतील अन्य आदर्शाप्रमाणेच हिवरे बाजारमध्ये विविध कार्यकारी सेवा सहकारी सोसायटीनेही आदर्श निर्माण केला आहे. शेतकऱ्यांना कर्जवाटप केल्यानंतर सततच्या अडचणीमुळे कर्जभरणा होत नसल्याने सोसायट्या अडचणीत आहेत. आदर्श गाव हिवरेबाजारच्या विविध कार्यकारी सेवा सहकारी सोसायटीने मात्र आदर्श निर्माण केला आहे. सुमारे साडेतीनशे सभासद असलेल्या या सोसायटीने यंदा सव्वातीन कोटी रुपये पद्मश्री पोपटराव पवार यांच्या मार्गदर्शनाखाली वाटप केलेल्या कर्जाची मार्चअखेरीसच शंभर टक्के वसुलीची केली जात आहे.

शंभर टक्के कर्जवसुलीची यंदाचे सोळावे वर्ष आहे. सेवा सहकारी सोसायटीने शंभर टक्के कर्जवसुलीची पंरपरा जोपासणारे हिवरेबाजार हे राज्यातील एकमेव गाव आहे. शंभर टक्के वसुली, लाभांशासह अन्य बाबींवर चर्चा करण्यासाठी झालेल्या बैठकीला पद्मश्री पोपटराव पवारांसह सोसायटीचे अध्यक्ष छ्बुराव ठाणगे, उपाध्यक्ष रामभाऊ चत्तर, सरपंच विमल ठाणगे, एस.टी. पादिर, रो. ना. पादिर, अर्जुन पवार, दामोधर ठाणगे, अशोक गोहड, सहदेव पवार, बाबा गुंजाळ, राजू सहादू ठाणगे, संदीप गुंजाळ, कुशाभाऊ ठाणगे आदी
उपस्थित होते.

पंधरा टक्के लाभांश
शंभर टक्के कर्जवसुलीमुळे नफ्यात आलेल्या हिवरेबाजार विविध कार्यकारी सेवा सहकारी सोसायटीकडून सभासदांना नऊ वर्षांपासून लाभांश वाटप केला जातो. मार्च अखेरीस वार्षिक सर्वसाधारण सभेत लाभांशाची घोषणा केली जाते आणि दिवाळीला वाटप केला जातो. यंदा पंधरा टक्के लाभांश देण्याची घोषणा केली आहे. राज्यातील काही मोजक्याच सेवा सहकारी सोसायट्यांत हिवरेबाजारची आदर्श सोसायटी आहे.