Pune Rain News : शिरूरमध्ये पावसाचा दणका

Pune News : जिल्ह्यात पावसाने दुसऱ्या दिवशी चांगलाच दणका दिला आहे. वादळी वारे व विजांच्या कडकडाटासह जोरदार पाऊस पडला. शुक्रवारी (ता.१३) सकाळी आठ वाजेपर्यंत शिरूरमधील वडगाव, न्हावरा आणि निमोणे मंडळात सर्वाधिक ६५ मिलिमीटर पाऊस पडल्याची नोंद झाली. त्यामुळे खरीप पेरण्यांना वेग येऊ लागला आहे.

मागील दोन दिवसांपासून जिल्ह्याच्या विविध भागांत पाऊस पडत आहे. दिवसभर ढगाळ वातावरण आणि सायंकाळनंतर अचानक वातावरणात बदल होत वादळी वाऱ्यासह जोरदार पाऊस कोसळत आहे. गुरुवारी (ता.१२) जिल्ह्यात सायंकाळनंतर अनेक ठिकाणी जोरदार पाऊस झाला.

हवेलीतील भोसरी येथे ३० मिलिमीटर पाऊस पडला असून पुणे वेधशाळा, केशवनगर, खेड २२, कोथरूड, हडपसर, वाघोली, अष्टापूर २६, खडकवासला २४, उरुळीकांचन २९ मिलिमीटर, तर मुळशीतील थेरगाव, पिंरगुटमध्ये २६, घोटावडे २५, कासार आंबोली २३ मिलिमीटर, तर पौड, माले, मुठे, सावरगाव, कोळवण, माण हलका पाऊस झाला.

भोरमधील वेळू २२ मिलिमीटर, तर भोलावडे, नसरापूर, किकवी, आंबवडे, संगमनेर, निगुडघर, हर्नास तुरळक सरी बरसल्या. मावळमधील कार्ला, खडकाळा, ताकवे ३० मिलिमीटर, ताकवे बु, वाडेश्वर २३, कुसगाव, लोणावळा येथे २२ मिलिमीटर पाऊस झाला. वडगाव मावळ, तळेगाव, काले, शिवणे, परिंदवाडी येथे हलक्या सरी कोसळल्या.

वेल्ह्यातील पानशेत, विंझर, आंबवणे येथेही पावसाचा चांगलाच शिडकावा झाला. जुन्नरमधील नारायणगाव, वडज येथे २४ मिलिमीटर, निमगाव सावा, बेल्हा २२, डिंगोरे, ओतूर, ओझर २१ मिलिमीटर पाऊस पडला असून वडगाव आनंद, राजूर, आपटाळे येथे तुरळक सरी बरसल्या.

खेडमधील कन्हेरसर येथे २६ मिलिमीटर, तर आळंदी येथे २५ मिलिमीटर, तर वाडा, राजगुरुनगर, कुडे, पाईट, चाकण, पिंपळगाव, कडूस, वेताळे, करंजविहिरे येथे हलका पाऊस झाला. आंबेगावमधील कळंब येथे २० मिलिमीटर, तर घोडेगाव, आंबेगाव, पारगाव, मंचर, निरगुडसर चांगलाच शिडकावा झाला.

शिरूरमधील टाकळी, मलठण, रांजणगाव २१, तळेगाव, कोरेगाव २०, पाबळ २६ मिलिमीटर पाऊस झाला. बारामतीतील सुपा, मोरगाव येथे ३६ मिलिमीटर, तर माळेगाव, पणदरे, वडगाव, लोणी, उंडवडी, शिर्सुफळ तुरळक सरी कोसळल्या. इंदापुरातील अंथुर्णी ३७ मिलिमीटर, निमगाव २८ मिलिमीटर, तर भिगवण, इंदापूर, लोणी, बावडा, काटी, सणसर, पळसदेव, लाखेवाडी हलक्या सरी पडल्या.

दौंडमधील पारगाव ६५, यवत बोरी पार्धी ४२, कडेगाव २०, राहू ४३, बोरी भडक २९, तर वरवंड, रावणगाव, दौंड, खामगाव, वडगाव बांदे, गिरीम, कुरकुंभ, देऊळगाव, पाटस येथे कमी-अधिक सरी बरसल्या. पुरंदरमधील राजेवाडी येथे २९ मिलिमीटर, सासवड २६ मिलिमीटर, तर भिवंडी, कुंभारवळण, जेजुरी, परिंचे, वाल्हा, शिवरी येथे पावसाचा शिडकावा झाला.

खरिपाच्या सुमारे आठ हजार हेक्टरवर पेरण्या

पुणे जिल्ह्यात आत्तापर्यंत जवळपास आठ हजार हेक्टरपर्यंत पेरण्या झाल्या आहेत. मागील आठवडाभर पावसाने उघडीप दिल्यानंतर शेतकऱ्यांनी मशागतीची कामे करून काही प्रमाणात पेरण्या केल्या आहेत.

परंतु भात पट्ट्यात अजूनही धूळवाफेवरील भात लागवडी झालेल्या नाहीत. त्यातच पाऊस सुरू झाल्याने भात खाचरे पुन्हा भरून वाहू लागली आहे. ज्या ठिकाणी पेरण्या केल्या आहेत, त्यासाठी हा पाऊस पोषक ठरत आहे. भारी जमिनीत अजूनही वाफसा स्थिती नसल्याने पेरण्या खोळंबल्याची स्थिती आहे.