Maharashtra Rain : कोल्हापूरच्या पश्चिम भागात पावसाचा जोर

Kolhapur News : कोल्हापूर जिल्ह्याच्या पश्चिम भागात मंगळवारी (ता. २) दुपारपर्यंत मध्यम ते जोरदार पाऊस सुरू होता. शाहूवाडी, राधानगरी, गगनबावडा तालुक्यांत मध्यम जोरदार पाऊस सुरू होता. पूर्व भागात मात्र एक दोन तासांनी एखादी हलकी सर व ढगाळ हवामान असे स्वरूप राहिले.

मंगळवारी (ता. २) सकाळी सातपर्यंतच्या आकडेवारीनुसार राधानगरी धरणातून ११०० क्युसेक पाण्याचा विसर्ग सुरू आहे. पंचगंगा नदीवरील शिंगणापूर, राजाराम, सुर्वे, रुई, इचलकरंजी व तेरवाड, कासारी नदीवरील यवलूज, वारणा नदीवरील- चिंचोली व माणगांव असे ९ बंधारे पाण्याखाली आहेत.

धरण क्षेत्रात मध्यम ते जोरदार पाऊस सुरू आहे. त्यामुळे पंचगंगेसह अन्य छोट्या उपनद्यांना पाणी आले आहे. कृष्णा वगळता अन्य नद्या दुथडी भरून वाहत आहेत. पन्हाळा व शाहूवाडी तालुक्यातील कासारी नदी पाणलोट क्षेत्रात दोन दिवस पडणाऱ्या दमदार पावसामुळे कासारी नदीच्या पातळीत झपाट्याने वाढ होऊन यंदा प्रथमच कासारीचे पाणी पात्राबाहेर पडले.

नदीवरील सर्वच बंधारे पाण्याखाली गेले. त्यामुळे या मार्गावरील वाहतूक बंद असून पर्यायी मार्गावरून सुरू आहे. मंगळवारी सकाळी आठ वाजता संपलेल्या चोवीस तासांत राधानगरी तालुक्यात सर्वाधिक ३९.२ मिमी पावसाची नोंद झाली.

गगनबावडा येथे ३८ मिमी पाऊस नोंदवला गेला. दुपारी एक वाजता पंचगंगा नदीची पाणी पातळी राजाराम बंधाऱ्याजवळ २० फुटांवर होती. सर्वच धरणांच्या पाणीपातळीत हळूहळू वाढ होत असल्याची माहिती पाटबंधारे विभागाच्या सूत्रांनी दिली.