Sindhudurg Rain : सिंधुदुर्गात काही भागांत जोरदार पाऊस

Sindhudurg Rain News : सिंधुदुर्गनगरी जिल्ह्यात विविध भागात शुक्रवारी (ता. २३) दुपारी बारानंतर पावसाला सुरुवात झाली आहे. काही भागात जोरदार सरीदेखील पडल्या.

जिल्ह्यात गेल्या आठ-दहा दिवसांत अपेक्षित पाऊस झाला नव्हता. चार-पाच दिवसांपासून तर हलक्या सरीदेखील थांबल्या होत्या. त्यामुळे दुबार पेरणीचे संकट घोंघावत होते.

अनेक शेतकऱ्यांनी भात रोपवाटिकांना पाणी देणे सुरू केले होते. तर काही ठिकाणी भात रोपे सुकण्यास सुरुवात झाली होती. त्यामुळे शेतकऱ्यांमध्ये चिंतेचे वातावरण होते. परंतु गुरुवारी (ता. २२) सायकांळी जिल्ह्याच्या काही भागांत हलक्या सरी पडण्यास सुरुवात झाली.

त्यानंतर शुक्रवारी सकाळीदेखील काही भागांत हलक्या सरी पडल्या. दरम्यान दुपारी बारापासून जिल्ह्यातील खारेपाटण, तळेरे या भागांत विजांच्या कडकडाटासह जोरदार पावसाला सुरुवात झाली.

जोरदार सरी या भागात पडल्या. याशिवाय संपूर्ण जिल्ह्यात पावसाळी वातावरण तयार झाले आहे. हवामान विभागानेदेखील जिल्ह्यात २३ जून ते ६ जुलै या कालावधीत ४० मिमीपेक्षा अधिक पाऊस होईल, असा अंदाज दिला आहे. शुक्रवारी सुरू झालेला पाऊस संपूर्ण जिल्ह्यात पडल्यास काही अंशी शेतीचे नुकसान टळेल अशी शक्यता आहे.