Heavy Rain : सिंधुदुर्गात मुसळधार पाऊस; अनेक भागांत पूरस्थिती

Sindhudurg News : सिंधुदुर्ग जिल्ह्यात वादळी वाऱ्यांसह मुसळधार पाऊस सुरूच असून सोमवारी (ता. १५) पहाटेपासून देखील जोरदार पाऊस सुरू होता. किनारपट्टी भागाला वादळी वाऱ्यांसह पावसाने झोडपून काढले.

त्यामुळे अनेक ठिकाणी पडझडीचे प्रकार घडले. जिल्ह्यात काही मार्गांवरील पुलावरून पुराचे पाणी वाहत असल्याने वाहतूक ठप्प झाली. तेरेखोल नदीने इशारा पातळी ओलांडल्याने पुराचा धोका निर्माण झाला आहे. पावसाचा मोठा फटका जिल्ह्यातील रेल्वे वाहतुकीला बसला आहे.

जिल्ह्यात शनिवारी (ता. १३) दिवसभर जोरदार पाऊस झाला. रात्री पावसात आणखी वाढ झाली. रविवारी (ता. १४) दिवसभर मुसळधार पावसाने जिल्ह्याला झोडपून काढले. किनारपट्टीला पावसाचा जोर अधिक होता.

त्यामुळे सावंतवाडी-वेंगुर्ला मार्गावर होडावडा येथील पुलावरून पुराचे पाणी वाहत असून या मार्गावरील वाहतूक मठमार्गे वळविण्यात आली. मालवण तालुक्यातील देवली परिसरात अनेक घरांची पडझड झाली. जिल्ह्यातील तेरेखोल नदीने इशारा पातळी ओलांडल्याने पुन्हा एकदा त्या भागात पूरस्थिती निर्माण होण्याची शक्यता आहे.