Heavy Rain : गुजरातमध्ये पावसाचे थैमान

Ahmedabad News : गुजरातमध्ये सुरू असलेल्या मुसळधार पावसामुळे राज्यात सोमवारी (ता. २७) विविध ठिकाणी सात जणांचा मृत्यू झाला आहे. येथील गांधीनगर, खेडा आणि वडोदरा येथे मुसळधार पावसाने भिंत कोसळल्याच्या घटनांमुळे चौघांचा, तर आणंद जिल्ह्यात दोघांचा बुडून आणि झाड अंगावर कोसळून एकाचा मृत्यू झाला असल्याची नोंद करण्यात आली आहे.

दरम्यान, मागील तीन दिवसांपासून गुजरातमध्ये सतत मुसळधार पाऊस सुरू आहे. राज्यातील नद्यांच्या पाणीपातळीत वाढ झाल्याने, तसेच धरणे भरून वाहू लागल्याने पंचमहाल, नवसारी, वलसाड, वडोदरा, भरूच, खेडा, गांधीनगर आरवली यांसह राज्यातील अनेक जिल्ह्यांतील सुमारे ६० हजार नागरिकांना सुरक्षित स्थळी स्थलांतरित करण्यात आले आहे.

हवामान खात्याच्या वतीने वर्तविण्यात आलेल्या अंदाजानुसार गुजरातमधील विविध भागात मुसळधार आणि अतिमुसळधार पावसाचा अंदाज व्यक्त केला आहे. सरकारने दिलेल्या माहितीनुसार, गुजरातमधील ९६ जलाशयांतील पाणीसाठ्याने धोक्याची पातळी ओलांडली आहे.

टंकारा येथे ३४७ मिलिमीटर पाऊस

गुजरातमधील बहुतांश भागात १०० टक्के पावसाची नोंद झाली असून अनेक ठिकाणी त्यापेक्षा अधिक पावसाची नोंद झाली आहे. आज सकाळी सहा वाजता नोंदविण्यात आलेल्या आकडेवारीनुसार मागील २४ तासांत मोर्बी जिल्ह्यातील टंकारा तालुक्यामध्ये ३४७ मि.मी. पावसाची नोंद झाली आहे.

ही गुजरातमधील मागील २४ तासांतील सर्वाधिक पावसाची नोंद आहे. त्याखालोखाल पंचमहाल येथे ३४६ मि.मी. पावसाची नोंद झाली आहे. तसेच नडियाद येथे ३२७ मि.मी. वडोदरा तालुक्यात ३१६ मि.मी. आणि आणंद येथे ३१४ मि.मी. पावसाची नोंद झाली आहे. गुजरातमधील २५१ तालुक्यांपैकी २४ तालुक्यांमध्ये २०० मि.मी. पेक्षा जास्त पावसाची आणि ९१ तालुक्यांमध्ये १०० पेक्षा जास्त मिलिमीटर पावसाची नोंद झाली आहे.