Summer Heat Impact : वाढती उष्णता अन् मजुरटंचाईने शेतकरी हैराण

Jalgaon News : खानदेशात उष्णता रोज वाढत आहे. कमाल तापमान ४० अंश सेल्सिअसवर पोहोचले आहे. केळीसह भाजीपाला व अन्य पिकांना उष्णतेचा फटका बसत आहे. मजूरटंचाई वाढत असतानाच खानदेशात उष्णताही वाढली आहे. सध्या किमान तापमानही १७ अंश सेल्सिअसवर पोहोचले आहे. तर कमाल तापमान ४० अंश सेल्सिअसवर आहे. सकाळी नऊपासून ऊन तापू लागले आहे.

यामुळे शेतीकामे सकाळी लवकर उरकण्याकडे शेतकऱ्यांचा कल आहे. सकाळी सात ते दुपारी दीड या कालावधीत शेतीकामे शेतकरी उरकून घेत आहेत. दुपारी पाचपर्यंत उष्णतेचा चटका बसत आहे. मजूरटंचाई असतानाच उष्णता वाढल्याने शेतीकामांवर परिणाम झाला आहे. केळी, भाजीपाला पिकांचे सिंचन करताना शेतकरी काटेकोर व्यवस्थापन करीत असून, सायंकाळी किंवा रात्री पिकांना पाणी दिले जात आहे.

तसेच खते देण्याचे कामही सकाळीच उरकले जात आहे. उष्णतेमुळे पीकवाढीवरही परिणाम होईल, अशी स्थिती आहे. उष्णतेचा फटका कलिंगड, खरबूज पिकास अधिकचा बसला आहे. यात मोठी हानी शेतकऱ्यांना सहन करावी लागली आहे. फळे नरम होऊन दर्जा घसरणे, त्यातून पाणी येणे, फळांच्या आतील भागात पोकळी तयार होऊन त्यांना चटके बसणे अशा समस्या कलिंगड पिकात आहेत. यामुळे पिकात १० ते १५ टक्के हानी झाल्याची स्थिती आहे.

तापमान ४३ अंशांपर्यंत जाण्याचा अंदाज

जळगाव जिल्ह्यात पुढे कमाल तापमान ४३ अश सेल्सिअसपर्यंत जाईल, असा इशारा प्रशासनाने दिला आहे. ही समस्या लक्षात घेऊन प्रशासनाने उष्माघात व अन्य बाबींसंबंधी रुग्णालयांत तयारी, व्यवस्था करण्याच्या सूचना दिल्या आहेत. उष्णाघात कक्ष काही रुग्णालयात कार्यरत झाल्याची माहिती आहे. सकाळीच कामे उरकून घेतली जावीत, दुपारी रस्त्यांवर, बाहेर पडणे टाळावे, असे आवाहनही करण्यात आले आहे.

क्रॉप कव्हरचा उपयोग

अलीकडेच केळी, पपईची लागवड झाली आहे. रोपे लहान व कोवळी असून, त्यांना उष्णतेचा मोठा फटका बसत आहे. यामुळे शेतकरी या पिकांचे उष्णतेपासून संरक्षण करण्यासाठी क्रॉप कव्हर लावून घेत आहेत. तसेच अनेक शेतकऱ्यांनी केळी पिकाभोवती धैंचाची लागवड केली आहे. केळी, पपई बागांभोवती हिरवी नेटही लावून घेतली जात आहे.