Weather News : विदर्भात उष्ण लाटेचा इशारा

Weather Forcasting : पुणे : सूर्य तळपू लागल्याने राज्यात उन्हाचा चटका वाढत आहे. वर्धा येथे राज्यातील उच्चांकी ४२.५ अंश सेल्सिअस तापमानाची नोंद झाली. आज (ता. ५) विदर्भात उष्ण लाट आणि उष्ण रात्रीचा इशारा देण्यात आला आहे. तर उत्तर महाराष्ट्रात तुरळक ठिकाणी विजांसह पावसाला अंदाज हवामान विभागाने वर्तविला आहे.

मध्य प्रदेशापासून विदर्भ, अंतर्गत कर्नाटक, दक्षिण तमिळनाडूपर्यंत हवेचा कमी दाबाचा पट्टा सक्रिय आहे. राज्यात सध्या ढगाळ आकाश होत असून, दिवसा उन्हाच्या झळा कायम आहेत. रात्री देखील उष्ण ठरत असून, उकाडा टिकून राहत आहे. राज्यात पावसाला पोषक हवामान होत असून, आज (ता. ५) उत्तर महाराष्ट्रातील नंदूरबार, धुळे जिल्ह्यात तुरळक ठिकाणी विजांसह पावसाची शक्यता आहे.

गुरुवारी (ता. ४) सकाळपर्यंतच्या २४ तासांमध्ये वर्धा येथे राज्यातील उच्चांकी ४२.५ अंश सेल्सिअस तापमान नोंदले गेले. ब्रह्मपुरी, सोलापूर, अकोला, जेऊर, मालेगाव, यवतमाळ येथे तापमानाचा पारा ४२ अंशांच्या पुढेच आहे. आज (ता. ५) विदर्भातील चंद्रपूर, यवतमाळ येथे उष्ण लाटेचा, तर वर्धा येथे उष्ण रात्रीचा इशारा (येलो अलर्ट) देण्यात आला आहे. तर उर्वरित राज्यात उष्ण व कोरड्या हवामानाचा अंदाज आहे.

गुरुवारी (ता. ४) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :
पुणे ३९.४, नगर ३९.०, धुळे ४१.०, जळगाव ४०.०, जेऊर ४२.०, कोल्हापूर ३८.७, महाबळेश्वर ३२.४, मालेगाव ४२.०, नाशिक ३७.९, निफाड ३७.५, सांगली ३९.४, सातारा ३९.२, सोलापूर ४२.२, सांताक्रूझ ३३.२, डहाणू ३३.७, रत्नागिरी ३१.८, छत्रपती संभाजीनगर ३९.५, बीड ४०.५, नांदेड ४०.८, परभणी ४१.२, अकोला ४२.२, अमरावती ४१.२, बुलडाणा ३९.०, ब्रह्मपुरी ४२.३, चंद्रपूर ४१.६, गडचिरोली ४०.६, गोंदिया ४०.६, नागपूर ४१.२, वर्धा ४२.५, वाशीम ४१.४, यवतमाळ ४२.०.

- उष्ण लाटेचा इशारा (येलो अलर्ट) :
चंद्रपूर, यवतमाळ.
- उष्ण रात्रीचा इशारा (येलो अलर्ट) :
वर्धा