Girna Dam : गिरणा धरणाचे पाणी नदीजोडद्वारे अंजनी, भोकरबारीत

Jalgaon News : जिल्ह्यासाठी महत्त्वाच्या असलेल्या गिरणा धरणात बुधवारी (ता. २८) सकाळी जलसाठा ९२ टक्के एवढा झाला. यानंतर जलसाठा नियंत्रणासंबंधी या धरणातून या पावसाळ्यात प्रथमच पाण्याचा विसर्ग सुरू झाला. या धरणाचे पाणी नदीजोडप्रकल्पाद्वारे अन्य धरणांत वळविण्यात आले आहे.

गिरणा धरण मागील वर्षी पाऊसमान कमी राहिल्याने फक्त ५६ टक्के भरले होते. यंदा हे धरण ऑगस्टअखेरिस ९२ टक्के भरले. त्यात पाण्याची आवक सुरूच होती. यामुळे बुधवारी त्यातून विसर्ग सुरू करण्यात आला. १२३८ क्यूसेस वेगाने हा विसर्ग बुधवारी सुरू होता.

पाऊस ओसरल्याने गिरणा धरणातील पाण्याची आवक मात्र कमी झाली आहे. यामुळे हा विसर्ग वाढविण्यात आला नाही. आवक कमी असल्याने हा विसर्ग कमी किंवा तत्कालीन स्थितीनुसार कमी अधिक केला जाईल, असे धरण प्रशासनाने म्हटले आहे.

गिरणा धरण नाशिकमधील नांदगावात आहे. जिल्ह्यातील चाळीसगाव व नांदगाव तालुक्याच्या सीमेवर हे धरण आहे. त्याचा उपयोग नाशिकमधील मालेगावसह जिल्ह्यातील चाळीसगाव, पाचोरा, भडगाव, एरंडोल, धरणगाव या भागास आहे. धरणात यंदा मुबलक जलसाठा असल्याने त्यातून रब्बीसाठी पाणी मिळणार आहे. यामुळे गिरणा पट्ट्यात आनंद आहे.

दुष्काळी पट्ट्यात सोडले पाणी

गिरणा नदीत पाचोरा, भडगाव आदी भागातील पावसामुळे पाण्याचा प्रवाह आहे. नदीत पाणी असल्याने धरणातून सोडलेले पाणी जिल्ह्यातील एरंडोल तालुक्यातील अंजनी प्रकल्पासह पारोळ्यातील म्हसवे तलाव व भोकरबारी लघु प्रकल्पात सोडण्यात आले आहे. भोकरबारी प्रकल्पात शून्य टक्के जलसाठा होता.

तर अंजनी प्रकल्पही यंदा फक्त २७ टक्केच भरला आहे. अंजनी मध्यम प्रकल्प असून, त्यात सुमारे चार टीएमसी पाणी साठवणक्षमता आहे. भोकरबारी व म्हसवे प्रकल्पांत जलसाठा वाढल्यास या भागातील टंचाई व पाण्याची समस्या दूर करण्यास मदत होणार आहे. तसेच अंजनी प्रकल्पदेखील एरंडोल शहरासाठी महत्त्वाचा आहे.