Ginger Rate : साताऱ्यात आले दरात सुधारणा

Satara News : आले पिकाच्या दरात (Ginger Rate) सुधारणा होऊ लागली असून, प्रति गाडीस (५०० किलो) कमाल २० ते २२ हजार रुपयांपर्यंत दर मिळत आहेत. बियाणे काढणीस सुरुवात झाल्यावर दरात सुधारणा होणार असल्याचा अंदाज व्यक्त केला जात आहे.

मागील पाच वर्षांपासून दरवाढीच्या प्रतीक्षेत असलेल्या आले उत्पादक शेतकऱ्यांना काही प्रमाणात का होईना दिलासा मिळत आहे.

मागील चार वर्षांत आले पिकाच्या (Ginger Crop) दराने नीचांकी पातळी गाठली होती. यामुळे आले उत्पादक अडचणीत आले होते. याचा परिणाम आले पिकांच्या क्षेत्रावर झाला आहे. एकूण लागवडीच्या तुलनेत २५ टक्के क्षेत्र कमी झाले आहे.

मागील सहा महिन्यांपासून आले पिकाच्या दरात संथगतीने का होईना सुधारणा सुरू झाली आहे. सध्या प्रतिगाडी मागे चार ते पाच हजार रुपयांनी सुधारणा झाली आहे.

सध्या आले पिकास प्रति गाडी कमाल २० ते २२ हजार रुपयांपर्यंत दर मिळत आहे. या हंगामात अति पावसामुळे आले पिकावर मूळकुजाचा प्रार्दुभाव वाढल्याने आले पीक काढून टाकावे लागले आहे. एकूण क्षेत्राच्या २० टक्के अधिक क्षेत्रावरील आले पीक काढले गेले आहे.

दरातील घसरणीमुळे क्षेत्रातही मोठी घट झाल्याने एकूणच आले पिकाचे क्षेत्र कमी शिल्लक आहे. यामुळे पुढील काळात दरात आणखी सुधारणा होण्याचे अंदाज व्यक्त केले जात आहेत.

यामुळे शेतकऱ्यांनी आले काढणीची घाई करू नये असा सल्ला तज्ज्ञांकडून दिला जात आहे. मागील पाच वर्षांपासून दरवाढीच्या प्रतीक्षेत असलेल्या आले उत्पादक शेतकऱ्यांना काही प्रमाणात का होईना दिलासा मिळत आहे.

बियाण्याला मिळणार चढे दर

जिल्ह्यात मे महिन्यापासून आले लागवड सुरू होते. या काळात सुरू असलेल्या दरात चार ते पाच हजार रुपये चढ्या दराने बियाणे मिळणार आहे. मागील वर्षी आठ ते १२ हजार रुपये दराने बियाणे विक्री झाली होती.

या वर्षी बियाण्याचे दर प्रति गाडी २० ते २५ हजार रुपयांदरम्यान जाण्याची शक्यता आहे. खते, कीटकनाशके तसेच मशागतीचे वाढलेले दर व बियाण्याचे दर यामुळे भांडवली खर्चात मोठी वाढ होणार आहे. याचा परिणाम क्षेत्रावर होणार असल्याने आले पिकांचे क्षेत्र कमी होणार आहे.