Ginger Crop Disease : आले पिकांवर कंदकुजीचा प्रादुर्भाव

Satara News : निसर्गात होत असलेले बदल आले पिकांस हानिकारक ठरू लागले आहेत. कधी मुसळधार पाऊस, तर कधी अचानक कडक ऊन यामुळे आले पिकांस कंदकुजीचा मोठ्या प्रमाणात प्रादुर्भाव दिसून येऊ लागला आहे. कंदकुजीमुळे ३० ते ४० टक्के आले पिकांचे क्षेत्र बाधित झाल्याचा अंदाज व्यक्त होत आहे.

राज्यभरात सातारी आले पिकांची वेगळी ओळख आहे. जिल्ह्यात सुमारे तीन हजार हेक्टर क्षेत्रावर लागवड होते. दरातील स्थिरतेमुळे जिल्ह्यात या वेळी सरासरी इतकी म्हणजे साडेतीन हजार हेक्टरवर लागवड झाली आहे. या हंगामासाठी बियाण्याचे दर गाडीला ४८ हजारांपासून ५२ हजारापर्यंत गेले होते.

आतापर्यंतच्या इतिहासात हे बियाण्याचे सर्वाधिक आहेत. बियाण्याचे दर सर्वाधिक असतानाही आले बियाणे खरेदी मोठ्या प्रमाणात झाली होती. मॉन्सूनपूर्व पाऊस जिल्ह्याच्या अनेक भागात हजेरी लावल्याने आले मशागत व लागवडीस पोषक वातावरण झाले होते. जिल्ह्यातील मे महिन्याच्या अखेरीस ६५ टक्क्यांवर लागवड होऊन जून महिन्यात लागवड आटोपली होती.

जिल्ह्यात आले पिकांची सरासरी लागवड साडेतीन हजार हेक्टर होत असते. मागील तीन वर्षांत समाधानकारक दरात स्थिरता आहे. यामुळे या हंगामात आले पीक लागवड करणाऱ्या शेतकऱ्यांच्या संख्येत वाढ झाल्याने बियाणे चढ जास्त असतानाही ५०० हेक्टर क्षेत्रात वाढ झाल्याचा अंदाज तज्ञांकडून व्यक्त केला जात आहे. यामुळे जिल्ह्यातील साडेतीन हजार हेक्टरवर लागवड झाल्याचा अंदाज आहे.

१५ दिवसांत चित्र बदलले

ऑगस्ट महिन्यात दमदार पाऊस झाल्याने धरणे भरण्यास मदत झाली. मात्र आले पिकांत पाणी साचू लागल्याने शेतकरी पाणी काढण्यासाठी धडपड सुरू ठेवली होती. त्यानंतर मात्र कडक ऊन, उष्णतेत झालेली वाढ तसेच अधूनमधून होणारा पाऊस यामुळे आले पिकांचे चित्र बदलून गेले होते. सुरुवातीस पोषक वातावरणमुळे दमदार आलेले आले पीक ऊन-पावसाच्या खेळामुळे अडचणीत आले आहे.

बिघडलेल्या वातावरणामुळे आले पिकांस मोठ्या प्रमाणात कंदकुज झाली आहे. हिरवेगार आल्याचे प्लॅाट आता पिवळे पडू लागले आहेत. एकूण क्षेत्रापैकी ३० ते ४० टक्के क्षेत्रातील आले पिकांस कंदकुज झाली आहे.

पीक वाचवण्यासाठी शेतकऱ्यांकडून मोठ्या प्रमाणात खर्च केला जात आहे. मात्र सतत वातावरणामुळे प्रादुर्भावात वाढ होताना दिसत आहे. जैविक, रासायनिक उपाय केले जात असल्याने खर्चात भरमसाट वाढ झाली आहे.