Solapur News : रोपवाटिकाधारकांनी शेतकऱ्यांना डाळिंबाची गुणवत्तापूर्ण, रोगमुक्त रोपे उपलब्ध करून देण्याकडे प्राधान्याने लक्ष द्यावे, असे आवाहन राष्ट्रीय डाळिंब संशोधन केंद्राचे संचालक डॉ. राजीव मराठे यांनी केले.
राष्ट्रीय डाळिंब संशोधन केंद्र, सोलापूर आणि राष्ट्रीय कृषी विकास योजना, महाराष्ट्र शासन यांच्या संयुक्त विद्यमाने डाळिंब रोपवाटिका धारकांसाठी एक दिवसीय प्रशिक्षण कार्यशाळेचे आयोजन करण्यात आले होते, त्यावेळी डॉ. मराठे बोलत होते.
प्रमुख पाहुणे म्हणून नॅशनल हॉर्टिकल्चर बोर्डचे जॉइंट डायरेक्टर आणि क्लीन प्लांट प्रोग्रामचे समन्वयक सी. पी. गांधी, सह्याद्रीचे व्यवस्थापकीय संचालक विलास शिंदे, जिल्हा अधीक्षक कृषी अधिकारी शुक्राचार्य भोसले, नाशिकचे जिल्हा अधीक्षक कृषी अधिकारी रवींद्र माने उपस्थित होते. डॉ. मराठे म्हणाले, की डाळिंबाच्या दर्जेदार रोपांसाठी आम्ही पहिल्यापासूनच आग्रह धरत आहोत. मूळात डाळिंबाच्या उत्पादनाशी ही बाब निगडित आहे.
शेतकऱ्यांनी आणि रोपवाटिकाधारकांनीही त्यादृष्टीने अधिक काळजी घेणे आवश्यक आहे, रोपवाटिका धारकांनी संशोधन केंद्राने तयार केलेल्या मार्गदर्शक तत्त्वांचे काटेकोर पालन करावे, अडचण आल्यास आम्हाला संपर्क करावा, असेही ते म्हणाले.श्री. माने यांनी रोगमुक्त रोपे शेतकऱ्यांपर्यंत पोहचल्यास बागेचे नुकसान आणि खर्च टाळता येऊन उत्पादनवाढ शक्य असल्याचे सांगितले.
क्लीन प्लांट प्रोग्राम संदर्भात माहिती देताना गांधी यांनी केंद्र सरकारद्वारे सुरू होणाऱ्या नव्या योजनांची माहिती दिली. तसेच रोपवाटिका धारकांच्या अडचणी सोडवण्यासाठी पाठपुरावा करण्याचे आश्वासन दिले. श्री. शिंदे यांनी संशोधन केंद्राला भेट देऊन डाळिंब व रोपविकास संदर्भातील विविध विषयांवर चर्चा केली. कार्यक्रमाचे सूत्रसंचालन डॉ. सोमनाथ पोखरे यांनी केले आणि आभारप्रदर्शन डॉ. मंजुनाथ यांनी केले.
रोपवाटिकेसंबंधी तांत्रिक सत्रे
या प्रशिक्षण कार्यक्रमात तांत्रिक सत्रात डॉ. चंद्रकांत अवचारे यांनी उत्कृष्ट रोप तयार करण्याचे तंत्रज्ञान सांगितले. डॉ. संग्राम धुमाळ यांनी रोपवाटिकेसाठी असलेल्या नियमावलीविषयी, डॉ. सोमनाथ पोखरे यांनी सूत्रकृमी व्यवस्थापन तर डॉ. मंजुनाथ एन. यांनी रोपवाटिकेतून पसरणाऱ्या रोगांबाबत माहिती दिली.
डाळिंब जातीच्या तंत्रज्ञानाचे हस्तांतरण
या कार्यक्रमादरम्यान केंद्रातर्फे विकसित करण्यात आलेल्या ‘सोलापूर लाल’ आणि ‘सोलापूर अनारदाना’ या डाळिंब जातींचे तंत्रज्ञान मोहिते नर्सरी (काटी, इंदापूर), गवळी नर्सरी (कासेगाव, पंढरपूर) आणि श्री नर्सरी फार्म (मानेगाव, माढा) या संस्थांना हस्तांतरित करण्यात आले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.