Libya Flood : लीबियामध्ये दोन हजारांवर पूरबळी

Flood Situation in Libya : लीबियामध्ये पुरात वाहून गेल्यामुळे मृत्युमुखी पडलेल्यांची संख्या दोन हजारांवर गेली आहे. मृतांची संख्या पाच हजारांच्या आसपास असू शकते, असा अंदाज सरकारी अधिकाऱ्यांनी व्यक्त केला आहे.

‘डॅनिएल’ या वादळामुळे सोमवारी (ता. ११) रात्री लीबियाच्या पूर्व भागात मुसळधार पाऊस कोसळल्यानंतर नद्यांना पूर आला होता. पाण्याचा जोर वाढून दोन धरणे फुटल्याने किनारपट्टीवरील डेर्ना या गावात पाण्याचा प्रचंड लोंढा शिरला. यात शेकडो जण वाहून गेले. पाणी समुद्रात निघून गेल्यानंतर गावातील चिखलातून मंगळवारपर्यंत (ता. १२) सातशे मृतदेह बाहेर काढण्यात आले होते. बुधवारी मृतांची संख्या दोन हजारांवर गेली आहे. अनेक मृतदेह समुद्रात वाहून गेले असण्याची शक्यता असल्याने मृतांची संख्या पाच हजारांवर जाण्याचा अंदाज अधिकाऱ्यांनी व्यक्त केला. या नैसर्गिक आपत्तीमुळे तीस हजारांहून अधिक लोक विस्थापित झाले आहेत.

अनेक वर्षांच्या अराजकतेमुळे पूर्व लीबियामध्ये नियोजनशून्य कारभार असून त्यामुळे हानीमध्ये भर पडत असल्याची टीका स्वयंसेवी संस्थांनी केली आहे. धरणे फुटल्यामुळे अत्यंत वेगाने पाणी वाहिल्याने अनेक घरांचे, पुलांचे आणि रस्त्यांचे नुकसान झाले आहे. या गावातील नुकसान इतके प्रचंड आहे की बचाव पथकांना तेथे मदत करणेही शक्य नाही, असे काही संस्थांनी सांगितले आहे. डेर्ना शहराला जोडणाऱ्या सात प्रमुख रस्त्यांपैकी पाच रस्ते पूर्णपणे वाहून गेल्याने आणि नदीवरील पुलही कोसळल्याने या शहरात मदत पोहोचविण्यात प्रचंड अडथळे येत आहेत.