Ahilyanagr News: निळवंडे धरणात ८० टक्के पाणीसाठा झाला असून वरच्या भागात पाऊस सुरू आहे. त्यामुळे सोमवारपासून सुरू केलेला विसर्ग मंगळवारी (ता. ८) सुरूच होता. प्रवरा नदीला पूर आला आहे. ओझर बंधाऱ्यातून मंगळवारी सकाळी १३ हजार २५० क्युसेकने विसर्ग सुरू होता. दरम्यान पश्चिम भागात पाऊस कमी झाल्याने भंडारदरा धरणातून पाण्याचा विसर्ग काहीसा कमी केला.
अहिल्यानगर जिल्ह्यातील अन्य भागांतही सोमवारी दुपारनंतर पावसाने हजेरी लावली.अकोले तालुक्याच्या पश्चिम भागात गेल्या काही दिवसांपासून पावसाची संततधार सुरू आहे. दोन दिवसांपासून पावसाचा जोर वाढला होता. अकरा टीएमसी क्षमतेच्या भंडारदरा धरणात पाणीसाठा सत्तर टक्के झाल्याने त्यावर स्थिर ठेवून पाणी विसर्ग सुरू केला.
ते पाणी निळवंडे धरणात आले. त्यामुळे निळवंडे धरणाचाही पाणीसाठा झपाट्याने वाढून ८४ टक्के झाला. त्यामुळे प्रवरा नदीत पाणी विसर्ग सुरू करत टप्प्याटप्प्याने पाणी आवकेनुसार त्यात वाढ केली. सोमवारी सायंकाळी सुमारे १४ हजार ५५५ क्युसेक विसर्ग सुरू होता. मंगळवारी दुपारी बारा वाजता हा विसर्ग १३ हजार २५० क्युसेक होता.
हे पाणी ओझर बंधाऱ्यातून जायकवाडीकडे जात आहे. ओझर बंधाऱ्यातूनही मंगळवारी दुपारी बारा वाजता १४ हजार ६७५ क्युसेक विसर्ग सुरू होता. त्यामुळे प्रवरा नदीला पूर आला असून, नदीकाठच्या लोकांना प्रशासनाने सावधानतेचा इशारा दिला आहे. जिल्ह्यातील बहुतांश भागात पावसाने दडी मारलेली होती.
मात्र सोमवारी काही प्रमाणात हलका पाऊस झाल्याने पिकांना काहीसा दिलासा मिळाल्यासारखे झाले आहे. अहिल्यानगर, नेवासा, पारनेर, शेवगाव, राहाता, राहुरी, कोपरगाव, अकोले, संगमनेर, कर्जत, जामखेड भागांत पाऊस झाला. पावसाअभावी पिके करपू लागली होती. मात्र पावसाने पिकांना आधार मिळाला आहे.
मुळा धरणात चांगली आवक
हरिश्‍चंद्रगड परिसरातही पावसाची संततधार सुरू आहे. त्यामुळे मुळा नदीतून मुळा धरणाकडे पाणी येणे सुरूच आहे. सोमवारी १३ हजार ३४२ क्युसेकने मुळा धरणात पाण्याची आवक होत होती. ही आवक मंगळवारी (ता. ८) ८ हजार २८ क्युसेकने सुरू होती.
मुळा धरणाचा पाणीसाठी मंगळवारी (ता. ७) सकाळी आठ वाजता ७६.१९ टक्के झाला होता. तर गेल्या २४ तासांत अकोल्यातील घाटघर येथे ११४ मिलिमीटर, रतनवाडी येथे १०९ मिलिमीटर, पांजरे येथे ८९ मिलिमीटर, भंडारदरा येथे ६० मिलिमीटर, निळवंडे येथे ५० मिलिमीटर व अकोले येथे ३९ मिलिमीटर पावसाची नोंद झाली आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.