Kisan Drone Update : नगर जिल्ह्यातील पहिले किसान ड्रोन राणेगावात

Nagar Kisan Drone News : बळीराजाला शेती व्यवसायात कीटकनाशक फवारणी, जमिनीच्या नोंदींचे दस्तऐवजीकरण, भाजीपाला, फळे शेतातून थेट बाजारपेठेत घेऊ जाण्यासाठी तसेच कमी वेळेत शेतीची कामे पूर्ण व्हवीत.

याकरिता केंद्र सरकारच्या कृषी यांत्रिकीकरण उपअभियानातून किसान ड्रोनची योजना अमलात आणली. या योजनेचा प्रथम लाभ जिल्ह्यातील राणेगाव (ता. शेवगाव) येथील कृषीपदवीधर शेतकऱ्याने मिळवला आहे.

या ड्रोनची किंमत दहा लाख रुपये असून यासाठी पाच लाखांचे आनुदान दिले जाते. ड्रोनला लावण्यात आलेल्या कीटकनाशक साठवणीच्या एका टाकीतून एक एकरचे शेत अवघ्या दहा मिनिटात फवारले जाणार असून त्यासाठी शेतकऱ्यांकडून एकरी ३०० ते ५०० रुपये आकारले जाणार आहेत.

ड्रोनच्या वापरामुळे शेतकऱ्यांच्या कीटकनाशक खर्चात ३० टक्के तर पाणी वापरात ९० टक्के बचत होणार आहे. कमी मजुरीत जलद फवारणी साध्य होणार आहे. देशात २ किलोपासून ते १५० किलो वजनाचे ड्रोन उपलब्ध असून राज्यात मात्र सर्वसाधारणपणे २५ किलो वजनाचे ड्रोन शेतीकामासाठी स्वीकारले जात आहे.

ड्रोन कृती आराखड्यानुसार पहिल्या टप्प्यात ३८ ड्रोन देण्यात आले असून २५ ठिकाणी ड्रोनयुक्त सेवा सुविधा केंद्रे उघडली जात आहेत. अनुदानासाठी कृषी विभागाने सोडत काढून नावे निश्चित केली आहेत.

यामध्ये जिल्ह्यातील राणेगाव येथील विवेक आपटे तसेच शेवगाव येथील जगदंबा महिला ग्राहक सहकारी संस्थेची किसान ड्रोनसाठी निवड झाली आहे. तालुका कृषी अधिकारी अंकुश टकले यांनी पाहणी केली.