Irrigation Subsidy : सिंचन अनुदान रखडल्याने आर्थिक संकट

Solapur News : बार्शी शहरासह तालुक्यातील २ हजार ६०० शेतकऱ्यांचे ठिबक, तुषार सिंचनाचे नऊ कोटी रुपयांचे अनुदान प्रलंबित आहे. हे अनुदान मिळाले नसल्यामुळे शेतकरी आर्थिक संकटात सापडला आहे. शासनाने लवकरात लवकर अनुदान वितरित करण्याची मागणी तालुक्यातील शेतकऱ्यांकडून होत आहे.

तालुक्यात पावसाच्या लहरीपणामुळे अनेक भागात शेतीसाठी कमी-अधिक प्रमाणात पाणी मिळते. आपली शेती चांगली फुलावी, शेतमालाला चांगला दर मिळावा, यासाठी शेतकरी आटोकाट प्रयत्न करतो, परंतु मागील सहा महिन्यांपासून सिंचनाचे अनुदान शेतकऱ्यांच्या पदरात आले नसल्याने त्यांची मोठी आर्थिक कुचंबणा होत आहे.

कृषी विभागाने याकडे गांभीर्याने लक्ष देऊन तालुक्यातील शेतकऱ्यांना न्याय देण्याची मागणी बळीराजांकडून केली जात आहे. ठिबक सिंचनासाठी एकरी सुमारे ४० ते ४५ हजार रुपये खर्च येतो, हाच खर्च तुषार सिंचनासाठी एकरी एका तुषार सिंचनाच्या संचासाठी वीस हजार रुपये खर्च येतो, तर मिनी स्प्रिंकलर सिंचनासाठी दर एकरी सुमारे ३६ हजार रुपये खर्च येतो.

अधिकृत दुकानदारांकडून हे सिंचनाचे संच शेतात बसविले जातात. अनुदान रक्कम खात्यात पडल्यानंतर शेतकऱ्यांमार्फत संबंधित दुकानदारास ती रक्कम अदा केली जाते. परंतु अनेक महिन्याच्या प्रतीक्षेनंतरही एकाही शेतकऱ्याला सिंचनाचे अनुदान मिळाले नाही. तालुक्यातील सुमारे ७० टक्के शेतकऱ्यांकडे ठिबक, तुषार अथवा मिनी स्प्रिंकलर सिंचनाच्या माध्यमातून शेती केली जाते.