Pune News : राज्यातील सार्वजनिक सुविधा (सीएससी) केंद्रांमार्फत शेतकरी ओळख क्रमांक मिळवण्यासाठी धावपळ करणाऱ्या शेतकऱ्यांना राज्य शासनाने मोठा दिलासा दिला आहे. शेतकरी आता गावशिवारात बसून स्वतःचा ओळख क्रमांक मिळवू शकतो. तशी सुविधा देणारे संकेतस्थळ नुकतेच सुरू झाले आहे.
कृषी विभागाच्या एका वरिष्ठ अधिकाऱ्याने सांगितले की, फार्मर रजिस्ट्री किंवा फार्मर आयडी म्हणजेच शेतकरी ओळख क्रमांक मिळवण्यासाठी सात-बाराधारकाला वणवण फिरण्याची गरज आता राहिलेली नाही. शेतकरी घरबसल्या संकेतस्थळावर जाऊन ऑनलाइन आपला क्रमांक मिळवू शकतील. कृषी विभागाकडील योजनांचा लाभ मिळण्यासाठी शासनाने १५ एप्रिलपासून शेतकरी ओळख क्रमांक बंधनकारक केला आहे. पूर्वी हा क्रमांक मिळवण्यासाठी सीएससी केंद्रात जाण्याशिवाय पर्याय नव्हता. आतापर्यंत ९४ लाख शेतकऱ्यांना ओळख क्रमांक मिळाला आहे. अजून वीस लाखांहून अधिक शेतकऱ्यांकडे स्वतःचा ओळख क्रमांक नाही.
जमिनीचा तपशील एकत्र दिसणार
शेतकरी ओळख क्रमांक मिळवण्यासाठी शेतकऱ्याला आधी स्वतःचा आधार क्रमांक व बॅंक खात्याशी संलग्न असलेला भ्रमणध्वनी क्रमांक जवळ ठेवावा लागेल. त्यानंतर https://mhfr.agristack.gov.in/farmer-registry-mh/#/ या संकेतस्थळावर जाताच नोंदणी करता येईल. संकेतस्थळावर आधी रकान्यामध्ये भ्रमणध्वनी क्रमांक टाकावा. त्यानंतर ओटीपी येईल. ओटीपी व कॅप्चा भरताच ‘क्रिएट न्यू अकाउंट’ येथे क्लिक करावे लागेल. त्यानंतर आधार क्रमांक टाकावा लागेल.
हा क्रमांक टाकताच पुन्हा ओटीपी येईल व वैधता पूर्ण होईल. ही प्रक्रिया होताच संकेतस्थळावर शेतकऱ्याला स्वतःच्या नावे कुठे जमिनी आहेत ते दिसू लागेल. आपापल्या जमिनीच्या चौकटीसमोर क्लिक करावे लागेल. समजा स्वतःच्या जमिनीचा तपशील आपोआप न आल्यास आपला सात-बारावरील गट नंबर टाकताच तपशील येईल. त्यावर क्लिक केल्यास तपशील दिसेल.
तीन प्रकारच्या मान्यता बंधनकारक
संकेतस्थळावर माहिती भरताच जमिनीचा तपशील आल्यानंतर शेतकऱ्याला तीन प्रकारच्या मान्यता (कंसेन्ट) देणे बंधनकारक असेल. ‘माझा सात-बारा उतारा नमूद केलेल्या माहितीस जोडावा’, ‘लाभ मिळण्यासाठी ही माहिती वापरावी’ तसेच ‘दिलेली माहिती खरी आहे,’ अशा तीन प्रकारच्या मान्यता असतील. शेतकऱ्याने मान्यतेसाठी क्लिक करताच पुन्हा ओटीपी येईल. तो टाकताच पुढे ‘रेकॉर्ड अपडेट सक्सेसफुली’ असा लघूसंदेश संबंधित शेतकऱ्याला आपल्या भ्रमणध्वनीवर येईल. त्यानंतर शेतकऱ्याचे नोंदणीचे काम समाप्त होईल.
अर्धा तासात मिळणार शेतकरी ओळख क्रमांक संकेतस्थळावर शेतकऱ्याने सर्व माहिती भरल्यानंतर ‘रेकॉर्ड अपडेट सक्सेसफुली’ असा लघूसंदेश येईल. त्यानंतर अर्धा तासाने भ्रमणध्वनीवर पीडीएफ फाइल मिळते. यात शेतकऱ्याचा सर्व तपशील असून एक ‘एनरोलमेंट नंबर’देखील दिसतो. हा नंबर म्हणजेच शेतकऱ्याचा ओळख क्रमांक असेल. यापुढे शेतकऱ्याच्या सर्व जमिनी एकाच क्रमांकाने ओळखल्या जाणार आहेत. तसेच, त्याला सरकारी मदत, अनुदान किंवा पत्रव्यवहारासाठीदेखील हा क्रमांक कायमस्वरूपी लागणार आहे. थोडक्यात शेतकऱ्याला यापुढे आधार क्रमांकाइतकाच शेतकऱ्याचा ओळख क्रमांक महत्त्वाचा असेल.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.